Палітвязьня Віталя Шчэрбіча асудзілі на чатыры гады ў калёніі
9 красавіка ў судзе Заводзкага раёна Менска агучылі прысуд палітзьняволенаму Віталю Шчэрбічу, якога вінавацілі ў падрыхтоўцы да масавых беспарадкаў у Менску.
Як паведамляе Праваабарончы цэнтар «Вясна», судзьдзя Анжэла Касьцюкевіч палічыла, што віна яго даказаная і прызначыла яму пакараньне, якое напярэдадні запрасіла дзяржабвінаваўца Вольга Дзендзілевіч, — пазбаўленьне волі тэрмінам на 4 гады ва ўмовах узмоцненнага рэжыму.
Віталя Шчэрбіча затрымалі 17 лістапада, пры ператрусе знайшлі піратэхнічныя вырабы і амуніцыю для страйкболу, а таксама дзевяць «вожыкаў». Усё абвінавачваньне мужчыны будавалася на інфармацыі ад мабільнага апэратара аб знаходжаньні абанэнцкага нумара Віталя ў месцах правядзеньня мітынгаў у жніўні і верасьні 2020 года, тэлефоннай размове з маці, пакінутых паведамленьняў у тэлеграм-чаце «Грамадзянская самааабарона Беларусі» ды канфіскаваных рэчах.
Віталь Шчэрбіч сваю віну не прызнаў.