Лінкі ўнівэрсальнага доступу

На няпэўны тэрмін перанесьлі менскі канцэрт расейскага гурту «Каста», які падтрымліваў беларускія пратэсты


Гурт "Каста"

Канцэрт расейскага гурту «Каста», заплянаваны ў Менску 9 красавіка, пераносіцца. Летась рэпэры актыўна падтрымалі беларускі пратэст і выпусьцілі рэзанансны кліп пра жорсткасьць сілавікоў.

У сацыяльных сетках канцэртнай пляцоўкі Prime Hall зьявілася інфармацыя пра перанос выступу «Касты». Новую дату абяцаюць назваць пазьней. Раней набытыя квіткі будуць актуальныя.

Інфармацыю парталу Tut.by пацьвердзілі і арганізатары — агенцтва Cube-A Sound. Назваць прычыны пераносу яны не гатовыя, але абяцаюць сказаць бліжэйшым часам.

Шэраг праўладных Telegram-каналаў некалькі дзён таму пісалі, што канцэрту ня будзе. Аўтары папракалі гурт, што ў сваім кліпе «Выходи гулять» музыкі «нядвухсэнсоўна заклікалі на несанкцыянаваныя акцыі і паказалі ў абсалютна нэгатыўным сьвятле сілавікоў, якія насамрэч займаюцца навядзеньнем парадку».

«Паводле законаў Беларусі, масавыя мерапрыемствы, у тым ліку клюбныя канцэрты, маюць на ўвазе ажыцьцяўленьне аховы і заключэньне дамовы з МУС. Такое пагадненьне з арганізатарамі канцэртаў „Касты“ на тэрыторыі краіны падпісанае ня будзе», — тлумачыў немагчымасьць выступу канал праўладнай «Белай Русі».

Сярод іншага рэпэрам прапанавалі публічна пакаяцца на «Славянскім базары» ў Віцебску.

Летась удзельнікі гурту ня толькі падтрымалі пратэстоўцаў, а нават пагадзіліся на бясплатную онлайн-трансьляцыю свайго канцэрту на дваровай сустрэчы ў жылым комплексе «Менск Сьвет», дзе пажадалі беларусам новага прэзыдэнта.

Сьледам артысты выпусцілі кліп «Выходи гулять» з адсылкамі да падзеяў у Беларусі. Ужо тады выканаўца Міхаіл Епіфанаў адзначаў, што справай прынцыпу было выказацца, нягледзячы на пагрозу адмены красавіцкага канцэрту.

Той кліп за чатыры месяцы паглядзелі больш за 8 мільёнаў разоў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG