Ва ўмовах палітычнага крызісу і абмежаваных магчымасьцяў фіскальнай і грашова-крэдытнай палітыкі, уплыву падатковага манэўру Расеі і адсутнасьці структурных рэформаў прагназуецца паглыбленьне рэцэсіі ў 2021 годзе і павольнае аднаўленьне пасьля гэтага, адзначаецца ў дакумэнце.
Так, у 2022 годзе чакаецца рост ВУП на 1,9%, у 2023-м — на 1,2%.
Сёлета запатрабаваньні ў вонкавым фінансаваньні будуць згорнутыя праз рэфінансаваньне доўгу перад Расеяй і выкарыстаньня рэзерваў. Але наступныя гады будуць складанымі з прычыны выплат па двухбаковых крэдытах і эўрааблігацыях, а таксама пачатку разьліку за крэдыт на будаўніцтва БелАЭС.
Экспэрты Сусьветнага банку ўдакладняюць, што нядаўняе падвышэньне падаткаў у Беларусі нэгатыўна адаб’ецца на прыватным сэктары, які і без таго адчувае цяжкасьці без падтрымкі падчас эпідэміі COVID-19. Рост рынкавых працэнтных ставак і падзеньне даверу з боку інвэстараў будуць стрымліваць унутраныя і замежныя інвэстыцыі.
Пры гэтым кантроль цэнаў ня здолее ўтрымаць інфляцыю, затое можа выклікаць дэфіцыт некаторых тавараў. Паводле ацэнак Сусьветнага банку, па выніках 2021 году інфляцыя дасягне 8,2%.
Таксама прагназуецца зьніжэньне рэальных заробкаў і даходаў, што адмоўна адаб’ецца на дабрабыце хатніх гаспадарак.
