Лінкі ўнівэрсальнага доступу

5 красавіка адновіцца суд над Віктарам Бабарыкам, чакаецца допыт банкіра


Віктар Бабарыка

Былы старшыня праўленьня «Белгазпрамбанку», экс-прэтэндэнт на пасаду прэзыдэнта Віктар Бабарыка ўпершыню дасьць паказаньні ў сваёй справе.

Працэс адновіцца 5 красавіка, паведаміў тэлеграм-канал Віктара Бабарыкі. Праходзіць ён па-ранейшаму будзе ў будынку суду Маскоўскага раёну Менску, але пад юрысдыкцыяй Вярхоўнага суду.

Віктар Бабарыка не даваў паказаньняў у час сьледчых дзеяньняў і не прызнаў сваёй віны, працягваючы адмаўляць яе і на судовых паседжаньнях.

Раней Вярхоўны суд вызначыў, што Бабарыку будуць дапытваць апошнім, хоць яго адвакаты прасілі даць яму слова раней за ўсіх. Суд таксама не дазволіў былому банкіру зьвярнуцца з заявай да пачатку судовых допытаў.

23 сакавіка Бабарыка заявіў адвод суду, але хадайніцтва не задаволілі.

Працэс у справе «Белгазпрамбанку», які да сыходу ў палітыку ўзначальваў Бабарыка, пачаўся 17 лютага. Журналістам недзяржаўных СМІ ў акрэдытацыі адмовілі, нягледзячы на тое, што суд абвешчаны адкрытым. На суд пускаюць толькі прадстаўнікоў дзяржаўных і расейскіх мэдыя.

Да пачатку асноўнага працэсу прэс-служба Вярхоўнага суду паведаміла, што з шасьцю абвінавачанымі ў справе «заключаны дасудовыя дамовы аб супрацоўніцтве». Бабарыка віны не прызнаў і ніякай дамовы аб супрацоўніцтве не падпісваў.

Былому банкіру прад’явілі абвінавачаньне паводле ч. 3 арт. 430 і ч. 2 арт. 235 Крымінальнага кодэксу (атрыманьне хабару арганізаванай групай у асабліва буйным памеры, а таксама легалізацыя сродкаў, атрыманых злачынным шляхам, у асабліва буйным памеры).

Перасьлед Віктара Бабарыкі. Што важна ведаць

  • 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
  • 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
  • Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
  • 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
  • 12 чэрвеня Лукашэнка заявіў, што Бабарыка таксама датычны да справы, маўляў, «​гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
  • Фігурантамі «справы „Белгазпрамбанку“» сталі каля 20 чалавек.
  • 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
  • 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
  • 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
  • Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
  • 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
  • Штаб Бабарыкі падрыхтаваў да здачы 435 тысяч подпісаў.
  • 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
  • 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу. Ён адкінуў усе абвінавачаньні.
  • 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
  • 24 ліпеня Генпракуратура перакваліфікавала абвінавачаньне Бабарыку: «даваньне хабару» стала «атрыманьнем хабару». Максымальна магчымае пакараньне — да 15 гадоў турмы.
  • 15 кастрычніка Мін'юст скасаваў адвакацкую ліцэнзію абаронцу Бабарыкі Аляксандру Пыльчанку.
  • 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
  • 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG