Лінкі ўнівэрсальнага доступу

Магілёўскаму перакладчыку дадалі «суткі» за рэпост публікацыі


Ілюстрацыйнае фота

У Магілёве перакладчыку, краязнаўцу і актывісту Таварыства беларускай мовы Анатолю Прасаловічу прысудзілі яшчэ сем дзён арышту на дадатак да сямі, якія ён ужо адбывае. Гэтым разам яго пакаралі за рэпост публікацыі, адным з элемэнтаў якой была нацысцкая сымболіка (ч. 1. Арт. 19.10 КАПП).

Прасаловіча затрымалі 27 сакавіка, а 30-га асудзілі за рэпост відэа зь лягатыпам, які ўнесены ў Рэспубліканскі сьпіс экстрэмісцкіх матэрыялаў. Ён пашырыў рэпартаж пра выставу пратэставага мастацтва ў Токіё.

2 красавіка Анатоля Прасаловіча прызналі вінаватым у рэпосьце здымка з нацысцкай сымболікай. Гэта быў калаж, элемэнтам якога былі пашыхтаваныя вайскоўцы «ў нацысцкай форме з павязкамі ў выглядзе крыжа». Паводле матэрыялаў справы, актывіст разьмясьціў здымак на сваёй старонцы ў Facebook без абмежаваньня доступу да яго. Скапіяваў яго з рэсурсу, унесенага ў Рэспубліканскі сьпіс экстрэмісцкіх матэрыялаў.

Прасаловіч «прызнаў сваю віну як ненаўмысную». Ён тлумачыў, што зрабіў перапост машынальна, не зьвярнуўшы ўвагі, што на здымку. Актывіст даводзіў, што ён не прыхільнік нацысцкіх ці нэанацысцкіх ідэалёгіяў, якія для яго варожыя. Паводле сьветапогляду яму блізкія сацыялізм і камунізм. Казаў, што ўдзельнічаў у аднаўленьні імёнаў забітых у Другую ўсясьветную вайну карнікамі жыхароў вёсцы Боркі, дзе цяпер мэмарыял «Памяці спаленых вёсак Магілёўскай вобласьці».

Прасаловіч прасіў судзьдзю Натальлю Панасенку прызначыць яму замест арышту грамадзкія працы або штраф. Спасылаўся на тое, што мае хранічныя хваробы, якія могуць запатрабаваць экстранай мэдычнай дапамогі.

Таварыства беларускай мовы ў характарыстыцы для суду адзначыла, што Прасаловіч шмат часу працуе ў архівах, шукаючы ўнікальныя дакумэнты, валодае мноствам моваў. Арганізацыя прасіла пакараць яго максымальна мякка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG