Лінкі ўнівэрсальнага доступу

У Менску на Дзень Волі прайшлі тры маршы з нацыянальнымі сьцягамі. ВІДЭА


Затрыманьні ў Менску 25 сакавіка

У той час як цэнтар Менску на Дзень Волі 25 сакавіка быў аточаны сіламі АМАПу і спэцтэхнікі, некалькі акцый прайшло ў мікрараёнах гораду.

Ад раніцы ў Менск сагналі вайсковую тэхніку і аўтазакі, вуліцы патрулявала міліцыя і «людзі ў цывільным».

Удзень у розных частках праспэкту Незалежнасьці, а таксама ў раёне мэтро Пушкінскай пачаліся кропкавыя затрыманьні.

Нягледзячы на гэта, у некалькіх раёнах Менску ўсё ж прайшлі невялікія маршы. Першымі калёнай выйшлі людзі з нацыянальнымі сьцягамі ў раёне Велазаводу.

Пазьней стала вядома пра невялікі марш у Малінаўцы.

А ўвечары марш прайшоў у Вайсковым гарадку, што пад менскім Уруччам.

Сёньня ў гонар Дня Волі людзі ў розных раёнах запускалі ў неба белыя і чырвоныя балёнікі, а таксама бел-чырвона-белыя сьцягі, вывешвалі сьцягі на дамах.

У раёне станцыі мэтро «Пушкінскай», на месцы забойства падчас разгону акцыі пратэсту Аляксандра Тарайкоўскага, нехта паклаў белыя і чырвоныя кветкі, ушанаваўшы такім чынам памяць загінулага.

А ўвечары па ўсім Менску пачалі запускаць салюты.

Па дадзеных на 21:30 «Вясне» вядома пра як мінімум 118 затрыманых у 19 гарадах Беларусі, зь іх 68 затрымана ў Менску. Валянтэры @spiski_okrestina па стане на 23.00 паведамляюць пра 178 затрыманых.

Прадстаўніца Міністэрства ўнутраных спраў Беларусі паведаміла, што за парушэньне заканадаўства аб масавых мерапрыемствах у Беларусі 25 сакавіка затрымана больш за 200 чалавек, піша БЕЛТА. Таксама праваахоўнікі выявілі 43 кіроўцаў, якія «парушалі правілы карыстаньня гукавымі сыгналамі».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG