У Пінску ліквідуюць прыватную дабрачынную арганізацыю «Палеская дабрыня». Пра гэта сайту «Мэдыя-Палесьсе» паведаміла яе заснавальніца Алена Шымоліна.
Цяпер Шымоліна ў Польшчы, яна зьехала зь Беларусі разам зь непаўналетняй дачкой. Паводле Алены, рашэньне аб ліквідацыі «Палескай дабрыні» Пінскі гарвыканкам ужо прыняў. Цяпер работнікі падатковай інспэкцыі тэлефануюць яе 80-гадовай маці, каб тая прынесла ім дакумэнты для ліквідацыі арганізацыі.
Заснавальніца прыватнай дабрачыннай арганізацыі адкрыта выступіла супраць улады, заклікала выбаршчыкаў галасаваць за кандыдата ў прэзыдэнты Сьвятлану Ціханоўскую, асудзіла жорсткасьць сілавікоў у дачыненьні да ўдзельнікаў пратэстаў, а яе арганізацыя аказвала матэрыяльную дапамогу пінчукам, якія пацярпелі ад гвалту міліцыі.
У офісе «Палескай дабрыні» і па месцы жыхарства Алены Шымолінай правялі ператрусы, канфіскавалі кампутарную тэхніку, статутныя і фінансавыя дакумэнты. Пасьля шматгадзіннага допыту ў міжраённым аддзеле Дэпартамэнту фінансавых расьсьледаваньняў Камітэту дзяржкантролю яе адпусьцілі. У тую ж ноч яна з дачкой пакінула Беларусь.
Па словах Шымолінай, тэчка з важнымі дакумэнтамі, якія даказваюць гвалт сілавікоў супраць мірных пратэстоўцаў у Пінску, знаходзіцца ў надзейным месцы.
