Лінкі ўнівэрсальнага доступу

Зьняволены рок-музыка Ігар Банцэр паведаміў, што галадае на сухую 15-ы дзень


Ігар Банцэр у горадзенскім судзе 12 сакавіка, архіўнае фота.

Горадзенскі музыка і актывіст Ігар Банцэр заявіў адвакату, не прымае ежу і ваду з 3 сакавіка.

Банцэр абвясьціў сухую галадоўку на пачатку свайго суду як пратэст супраць палітызаванасьці ягонай крымінальнай справы аб хуліганстве, а таксама ў знак нязгоды з палітычнымі падзеямі ў Беларусі.

Лекары кажуць, што ўжо на першым тыдні адмовы ад вады могуць наступіць незваротныя зьмены ў арганізьме або сьмерць.

На апошнім судовым паседжаньні па ягонай справе 12 сакавіка Банцэр прасіў у суду зьмяніць яму меру стрыманьня і выпусьціць з-пад варты, бо «ён выправіўся». Аднак судзьдзя Натальля Козел не задаволіла ягонага хадайніцтва, каб ён «не схаваўся ад перасьледу».

«Да панядзелка я дацягну, а далей ня ведаю», — адказаў на гэта музыкант.
Наступнае паседжаньне па ягонай справе прызначылі на 14:30 18 сакавіка. Гэта будзе 16-ы дзень галадоўкі, калі Банцэр ня спыніцца.

Тэлеграм-канал «Страна Для Жизни» даслаў навіны ад адваката Ігара Банцэра:

«Ігар прасіў паведаміць, што адчувае сябе выдатна як на 14-я суткі сухой галадоўкі. Усё так жа настроены рашуча. Яго зноў перавялі ў іншую камэру. Паведамілі, што будзе пакараны 3 суткамі карцэру, але адправяць ці не, ня ведаю».

Што трэба ведаць па справе Банцэра

Ігара Банцэра судзяць за тое, што дэманстраваў палавыя органы перад міліцыянтам. Пазыцыя Банцэра: гэта быў пэрформанс з танцам, падчас якога ён зьняў шорты, але заставаўся ў стрынгах, а сьпераду яго прыкрывала паясная торбачка.

Пацярпелы міліцыянт ня мае прэтэнзій да Банцэра, першапачаткова ён расцаніў ягоны ўчынак як п’яную выхадку, а не як крымінальнае злачынства.
Банцэру пагражае да трох гадоў калёніі. Ён пад вартай з 20 кастрычніка мінулага году.

Яму 41 год, жанаты, мае траіх непаўналетніх дзяцей. Летась яго тройчы затрымлівалі за ўдзел у пратэставых акцыях, ён адседзеў па адміністрацыйных справах 18 сутак.

За 4,5 месяца зьняволеньня Банцэр амаль увесь час сядзеў у адзіночнай камэры і некалькі разоў у карцары. Таксама яго высылалі на псыхіятрычную экспэртызу ў Навінкі пад Менскам. Экспэртыза паказала, што ён здаровы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG