Лінкі ўнівэрсальнага доступу

Лукашэнка загадаў вайскоўцам «ваяваць знутры»


Аляксандар Лукашэнка

Новы кіраўнік Генштабу і новы намесьнік міністра абароны вучыліся ў Маскве.

Аляксандар Лукашэнка прызначыў намесьнікаў міністраў абароны, а таксама зрабіў шэраг прызначэньняў у кіраўніцтве Ўзброеных сілаў, паведамляе прэс-служба Міністэрства абароны.

Генэрал-маёр Віктар Гулевіч узначаліў Генэральны штаб, адпаведна стаўшы і першым намесьнікам міністра абароны. Ён скончыў Маскоўскую вышэйшую агульнавайсковую камандную вучэльню і Вайсковую акадэмію Беларусі. Службу праходзіў у вайсковай выведцы і сілах спэцапэрацый. Зь лютага 2020 году камандаваў войскамі Заходняга апэратыўнага камандаваньня.

Генэрал-маёр Андрэй Жук стаў намесьнікам міністра абароны. Ён скончыў Менскую сувораўскую вучэльню, Маскоўскую вышэйшую агульнавайсковую камандную вучэльню і камандна-штабны факультэт Вайсковай акадэміі Беларусі. З траўня 2018-га ачольваў войскі Паўночна-заходняга апэратыўнага камандаваньня.

Замест Жука яго цяпер узначаліў Аляксандар Навуменка, які раней кіраваў Менскай сувораўскай вучэльняй.

Камандуючым войскамі Заходняга апэратыўнага камандаваньня прызначылі генэрал-маёра Ігара Дземідзенку.

Лукашэнка пра «людзей, якія ваявалі»

Прызначаючы новых людзей у Генштаб і Мінабароны, Лукашэнка зрабіў галоўны ўпор на тое, што камандаваць апэратыўнымі напрамкамі і быць начальнікам штабу і намесьнікамі міністра мусяць людзі, «якія ваявалі».

Паводле яго, «войны сёньня набываюць іншы характар. Магчыма, будуць падрываць знутры».

«Ледзь-ледзь нас зачапілі са жніўня, пасьля выбараў. Пакаштавалі нас на зуб, зуб зламалі. Зараз на ўсе зубы будуць спрабаваць, і будуць спрабаваць знутры. Публічна кажу: нам, людзям ваенным, давядзецца абараняць сваю краіну, пачынаючы знутры. Ня трэба сядзець у войсках і чакаць, што нехта перасячэ нашу мяжу і тады мы стрэльбу возьмем і пачнём ваяваць. Ваяваць будзем адсюль».

У студзені Аляксандар Лукашэнка прызначыў Аляксандра Вальфовіча з Генштабу дзяржсакратаром Савету бясьпекі. Гэта была трэцяя перастаноўка на пасадзе за год, да Вальфовіча там пакіравалі Андрэй Раўкоў і Валер Вакульчык.

Прызначаючы Вальфовіча, Лукашэнка таксама казаў пра «вонкавыя пагрозы» і неабходнасьць разам з Расеяй выяўляць ворагаў і змагацца зь імі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG