Лінкі ўнівэрсальнага доступу

Amnesty International: Эрытрэйскія вайскоўцы расстралялі ў лістападзе сотні мірных жыхароў


Этыёпская жанчына, якая ўцякла з зоны баявых дзеяньняў у вёсцы Хамдан, 22 лістапада 2020 году

Міжнародная праваабарончая арганізацыя Amnesty International абвінаваціла вайскоўцаў Эрытрэі ў забойстве сотняў мірных жыхароў у этыёпскім горадзе Аксума на тэрыторыі штату Тыграй, перадае Reuters.

Паводле справаздачы, на працягу сутак, лічачы ад 28–29 лістапада мінулага году, вайскоўцы эрытрэйскай арміі адкрывалі агонь па мірных жыхарах.

Гэтую інфармацыю пацьвярджаюць спадарожнікавыя здымкі і сьведчаньні некалькіх дзясяткаў відавочцаў, гаворыцца ў дакладзе. Там сказана, што побач зь дзьвюма цэрквамі ў Аксума, праўдападобна, разьмяшчаюцца масавыя пахаваньні. Як паведамляецца, салдаты проста на вуліцах забівалі мужчын і хлопчыкаў, а таксама чынілі масавыя рабункі.

Адзін зь мясцовых жыхароў расказаў праваабаронцам, што вайскоўцы застрэлілі шасьцярых членаў яго сям’і, у тым ліку 17-гадовага брата і 78-гадовага бацьку. Іншы відавочца паведаміў, што каля ягонага дому салдаты паставілі ў шэраг шасьцярых чалавек і расстралялі іх са сьпіны.

Рэгіянальны дырэктар Amnesty International па Ўсходняй і Паўднёвай Афрыцы Дэпразэ Мюнхэн назваў тое, што адбылося, маштабнымі злачынствамі супраць чалавечнасьці. Арганізацыя сабрала імёны больш як 240 ахвяраў, аднак не змагла цяпер незалежна пацьвердзіць канкрэтную колькасьць загінулых і абставіны здарэньня ў цэлым: у Тыграі няма інтэрнэту, таму атрымаць доступ да абʼектыўных зьвестак цяжка.

Трагічны інцыдэнт стаў часткай канфлікту, у якім з аднаго боку ўдзельнічаюць Эрытрэя і Этыёпія, а з другога — паўстанцы Народнага фронту вызваленьня Тыграя. Аксума — горад з насельніцтвам крыху больш за 60 тысяч чалавек — 19 лістапада мінулага году быў узяты этыёпска-эрытрэйскімі войскамі ў ходзе кровапралітнага наступу. Згаданыя вышэй падзеі адбыліся пасьля таго, як у канцы лістапада невялікая група апалчэнцаў атакавала базу салдат. Тыя адказалі акцыяй помсты супраць бяззбройных жыхароў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG