Напярэдадні ў Тбілісі быў арыштаваны лідэр апазыцыйнай партыі «Адзіны нацыянальны рух» Ніканор Мэлія. У сутыкненьнях паміж паліцыяй і прыхільнікамі Мэліі падчас яго затрыманьня пацярпелі 17 чалавек, больш за 20 былі затрыманыя за непадпарадкаваньне ўладам.
Мэлію затрымалі паводле абвінавачаньня ў арганізацыі і кіраўніцтве групавым гвалтам, а таксама ўдзеле ў ім — па справе аб беспарадках 20 чэрвеня 2019 году, таксама вядомых як «ноч Гаўрылава».
«ЗША глыбока занепакоеныя арыштам лідэра апазыцыі Мэліі і іншых прадстаўнікоў апазыцыі ў Грузіі», — сказаў кіраўнік прэсавай службы Дзярждэпартамэнту ЗША Нэд Прайс.
Ён дадаў, што Вашынгтон заклікае ўсе бакі «праявіць стрыманасьць і пазьбягаць якіх-небудзь дзеяньняў або рыторыкі, якія маглі б прывесьці да эскаляцыі напружанасьці або гвалту».
«Мы заклікаем улады Грузіі дзейнічаць у адпаведнасьці зь іх эўраатлянтычнымі памкненьнямі і пацьвярджаць сваю прыхільнасьць да прынцыпаў дэмакратыі, свабоды асобы і вяршэнства закону, гарантуючы, што судовая сыстэма вольная ад палітычнай ангажаванасьці», — адзначыў Прайс.
«Тое, што мы бачылі ў апошнія дні, супярэчыць эўраатлянтычным чаканьням Грузіі», — рэзюмаваў Прайс.
Прэм’ер-міністар Грузіі Іраклі Гарыбашвілі заклікаў усе палітычныя сілы да дыялёгу пра будучыню краіны.
«Сёньня, калі выкананы закон і дзяржава апынулася на вышыні, я хачу заклікаць усе палітычныя сілы, якім дарагая наша краіна, да адкрыцьця рэальнага дыялёгу. Давайце гаварыць не пра тое, што нас падзяляе, а пра тое, што нас абʼядноўвае», — гаворыцца ў звароце, распаўсюджаным прэсавай службай ураду.
Гарыбашвілі заклікаў апазыцыйныя сілы выкарыстоўваць парлямэнт у якасьці галоўнай пляцоўкі для абмеркаваньня. Адначасова прэмʼер дадаў, што кіроўная партыя «Грузінская мара» гатовая да сапраўднага дыялёгу «ў любы час і ў любым фармаце».
Учора пасьля арышту Мэліі сотні прыхільнікаў апазыцыі зладзілі акцыю пратэсту ля будынку парлямэнту, паставіўшы намёты.
26 лютага ў Тбілісі пройдзе вялікае шэсьце апазыцыі з патрабаваньнем вызваліць Ніканора Мэлію.
Сам Мэлія і яго паплечнікі называюць перасьлед палітычна матываваным. Заснавальнік партыі «Адзіны нацыянальны рух», экс-прэзыдэнт Грузіі Міхэіл Саакашвілі зьвярнуўся да грузінскага народу з заклікам выйсьці на вуліцы, каб «абараніць ня толькі Ніканора Мэлію, але і сваю свабоду і свабоду краіны».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў