Лінкі ўнівэрсальнага доступу

Сілавікі выносяць абсталяваньне з офісу БАЖ у Менску, 16 лютага
Сілавікі выносяць абсталяваньне з офісу БАЖ у Менску, 16 лютага

Ператрусы ў журналістаў і праваабаронцаў, сьледчыя шукаюць доказы «фінансаваньня пратэстаў»

З раніцы 16 лютага сьледчыя прыйшлі ў кватэры і офісы праваабаронцаў, журналістаў, прадстаўнікоў незалежных прафсаюзаў па ўсёй краіне. Шукаюць матэрыялы аб фінансаваньні пратэстаў.

10:53 16.2.2021

Больш за 20 ператрусаў па ўсёй Беларусі

Ператрусы ідуць па ўсёй Беларусі, сьледчыя прыйшлі у офісы БАЖ, «Вясны», прафсаюза РЭП, у кватэры журналістаў і праваабаронцаў і іх сваякоў.

Сьпіс тут:

10:54 16.2.2021

Сьледчы камітэт Беларусі патлумачыў прычыны ператрусаў у праваабаронцаў і журналістаў

Заява апублікавалая ў тэлеграм-канале ведамства:

«Сьледчым камітэтам працягваецца расьсьледаваньне крымінальнай справы паводле арт.342 (арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх) Крымінальнага кодэксу Беларусі.

У межах папярэдняга расьсьледаваньня з мэтай высьвятленьня абставінаў фінансаваньня пратэставай дзейнасьці сьледзтвам ініцыявана правядзеньне ператрусаў у арганізацыях, якія пазыцыянуюць сябе як праваабарончыя.

Правядзеньне працэсуальных дзеяньняў даручана супрацоўнікам ГУБАЗіК МУС і санкцыянавана Генэральнай пракуратурай. Канчатковая прававая ацэнка сытуацыі будзе дадзена пасьля правядзеньня ўсяго комплексу працэсуальных дзеяньняў».

11:05 16.2.2021

Праўладны Беларускі саюз журналістаў паведаміў пра затрыманьне Андрэя Бастунца, Барыса Гарэцкага і Алега Агеева

Заява зьявілася ў тэлеграм-канале арганізацыі.

Там адзначылі, што Камітэт па этыцы і «саюзьнікі» ў Палаце прадстаўнікоў «у выпадку неабходнасьці і запыту» будуць гатовыя аказаць Асацыяцыі неабходную прававую дапамогу.Пры гэтым БСЖ асобна адзначыў, што папярэдне сьледчыя дзеяньні зьвязаныя зь незаконным, у тым ліку замежным фінансаваньнем дзейнасьці офісу і шэрагу «замежных агентаў» у галіне СМІ. БСЖ апэруе гэтым тэрмінам, хоць закон «аб замежных агентах» яшчэ нават не прынялі да разгляду ў Палаце прадстаўнікоў. У постскрыптуме да свайго допісу праўладнае аб'яднаньне журналістаў адзначае, што БАЖ за апошні год ніводнага разу не асудзіў «напады» на сябраў іх саюзу. Сам БСЖ пры гэтым ані разу ня выступіў з афіцыйнай заявай, дзе б асуджаліся арышты і крымінальныя справы супраць членаў БАЖ.

11:07 16.2.2021

Ператрус у офісе Праваабарончага цэнтру «Вясна»

Каля 10.40 пачаўся ператрус на офісе ПЦ «Вясна» ў Менску па пр. Незалежнасьці 78а. Туды прыехаў старшыня арганізацыі Алесь Бяляцкі.

Раней прайшоў ператрус у праваабаронцы «Вясны» Зьмітра Салаўёва. У яго забралі тэлефон і ўсю тэхніку. Зьміцер затрыманы. З ператрусам прыйшлі да каардынатара кампаніі «Праваабаронцы супраць сьмяротнага пакараньня ў Беларусі», праваабаронцы «Вясны» Андрэя Палуды.

11:11 16.2.2021

«Прыйшлі 7 чалавек са зброяй». Сын старшыні БАЖ Андрэя Бастунца Арсеній пракамэнтаваў ператрус

Ператрус прайшоў ня толькі дома ў старшыні БАЖ Андрэя БАстунца, але і ў кватэры, дзе жыве ягоны сын.

11:14 16.2.2021

Скончыўся ператрус у Барыса Гарэцкага

Гэта намесьнік старшыні Беларускай асацыяцыі журналістаў.

Пра гэта паведаміла Наста Дашкевіч: «Ён дома. Тэхнікі і тэлефонаў – няма».

Як паведамляе БАЖ, Гарэцкі распавёў, што да яго дадому прыйшлі ў 7.25 раніцы, настойліва званілі ў дзьверы, потым прыйшлі з абсталяваньнем, каб рэзаць дзьверы.
Барыс адкрыў. «Рукі за сьпіну і г.д»., але дома было трое дзяцей, таму прайшло даволі мякка, сілавую групу адправілі», – распавёў Гарэцкі. Паводле ягоных слоў, абшукалі ўсё, нават у сьметніцах і лядоўні глядзелі. Забралі ноўты, тэлефоны, сямейныя грошы (няшмат).

Усё працягвалася каля 3-4 гадзін. Ператрус быў у межах арт. 342 КК. Вобшук праводзіў Сьледчы камітэт, санкцыя пракуратуры.

11:18 16.2.2021

Ператрус прайшоў у эксперта па лічбавай бясьпецы Мікалая Кванталіяні

Пра гэта паведамляе БАЖ.

11:26 16.2.2021

Ператрус у гомельскай настаўніцы

У Гомелі праходзіць з сям'і раніцы вобшук у настаўніцы Надзеі Лашэнка-Казаковай. У лістападзе 2020 году яе з сяброўкай затрымала міліцыя за «адзенне пратэстных колераў». Жыхаркі Гомеля атрымалі штраф. Пазьней Надзея Лашэнка-Казакова вымушана была звольніцца. Прычыны вобшуку невядомыя

11:34 16.2.2021

Ператрус у праваабаронцы ў Віцебску

Прайшоў ператрус у бацькоў віцебскай праваабаронцы Ірыны Трацьцяковай. Шукалі дакумэнты. Забралі флэшку і кніжку «Маніторынг аддзяленьняў міліцыі». Сама Ірына на волі, паведамляе «Вясна».

11:36 16.2.2021

У журналісткі Ларысы Шчыраковай ператрус скончыўся

Ладзілі ператрус супрацоўнікі ГУБАЗіКу, прысутнічалі амапаўцы. Ператрус доўжыўся 3 гадзіны. Пыталі пра грошы, забралі фота-відэа тэхніку, накапляльнікі інфармацыі, нацыянальныя сьцягі і плякаты «Я – нячэсны журналіст», «Свабоду Судаленку».

Роўна 10 гадоў таму супрацоўнікі КДБ ладзілі ператрус у хаце журналісткі таксама па т. зв. масавых беспарадках, – паведамляе «Гомельская Вясна».

11:46 16.2.2021

Барыс Гарэцкі пасьля ператрусу: «Які ў мяне статус, пакуль не сказалі»

Намесьнік старшыні БАЖ Барыс Гарэцкі распавёў дэталі ператрусу:

«Вельмі шчыльна прайшліся па ўсёй кватэры, зазіралі ў кожную шчыліну, нават дзіцячыя рэчы глядзелі. Забралі ўсю тэхніку, два кампутары, чамусьці іх зацікавілі кнігі Ўладзімір Арлова».

11:53 16.2.2021

Вядома пра 25 ператрусаў па ўсёй Беларусі

Агулам па Беларусі адбыліся і адбываюцца сама меней 25 ператрусаў у сябраў БАЖ, «Вясны» і прафсаюзу РЭП. Яны прайшлі ў Менску, Магілёве, Віцебску, Гомлі, Мазыры, Берасьці, Рэчыцы. Некалькі чалавек, зьвязаных са згаданымі арганізацыямі дагэтуль не выходзяць на сувязь. Гаворка, у прыватнасьці, пра юрыста «Вясны» Паўла Сапелку, берасьцейскага праваабаронцу Ўладзімера Вялічкіна. Магчыма, у іх кватэрах ці на офісах таксама ператрусы.

11:58 16.2.2021

«Рукі за сьпіну!» Ператрус у кватэры сына старшыні БАЖ

Сын кіраўніка Беларускай асацыяцыі журналістаў Арсеній Бастунец распавёў як да яго ў кватэру прыйшлі сілавікі, 7 чалавек са зброяй.

12:02 16.2.2021

Ператрус у валянтэра ў Гомлі

Ператрус прахозіць таксама ў гомельскага валянтэра Ільлі Міронава. Ён займаецца дапамогай тым, хто трапіў пад палітычны перасьлед ці па артыкуле 23.34 КаАП. Вядома, што ў Міронава забралі ўсю кампутарную тэхніку і тэлефоны

12:05 16.2.2021

Сьвятлана Ціханоўская пракамэнтавала масавыя ператрусы

Яна параіла шукаць злачынцаў у офісах АМАПу, ГУБАЗіК і ўсіх адказных за рэпрэсіі.
«Гэта і ёсьць сапраўдны дзяржаўны крызіс, бо дзеля ўтрыманьня ўлады рэжым рэпрэсуе нават тых, хто абараняе правы людзей. Пакуль гэта адбываецца, у небясьпецы знаходзяцца ўсе беларусы».

Ціханоўская перакананая, што такімі дзеяньнямі Лукашэнка сам зьбірае матэрыялы справы для міжнароднага трыбуналу супраць сябе і набліжаных да яго. Ціханоўская сказала, што яе штаб перадаў інфармацыю ў Эўразьвяз і Раду ААН у правах чалавека з патрабаваньнем прыняць захады.

12:11 16.2.2021

Ператрус у бацькі незалежнага журналіста ў Гомлі

Яўген Меркіс
Яўген Меркіс

У кватэры бацькі журналіста Яўгена Меркіса адбыўся ператрус. Забралі тэхніку (кампутары брата і бацькі, а таксама тэлефоны), паведамляе БАЖ.

12:18 16.2.2021

Ператрусы ў валянтэрак у Берасьці

У Берасьці прышлі з ператрусамі да бацькоў валянтэрак Кацярыны Бажко і Ганны Багдановіч. Пакуль берасьцейскі праваабаронца Ўладзімер Вялічкін, не адказвае на тэлефанаваньні і ягоная жонка.​

12:32 16.2.2021

Што за арганізацыя БАЖ, куды прыйшлі сілавікі

Сярод тых, у каго сёньня адбываюцца ператрусы, кіраўнікі Беларускай асацыяцыі журналістаў. Зь ператрусам таксама прыйшлі ў офіс БАЖ. Беларуская асацыяцыя журналістаў дзейнічае з 1995 году, гэта недзяржаўная арганізацыя, якая аб’ядноўвае журналістаў, садзейнічае разьвіцьцю журналістыкі. З 1997 году БАЖ — асацыяваны сябра Міжнароднай фэдэрацыі журналістыкі. У 2006 годзе БАЖ прайшла дзяржаўную перарэгістрацыю ў Беларусі.

12:33 16.2.2021

Ператрус у офісе БАЖ скончыўся, дзьверы апячаталі

З офіса БАЖ забралі сістэмны блок кампутара, тэчку з заявамі на ўступленьне новых сябраў арганізацыі. Прагледзелі ўсе працоўныя месцы, шафы. Дзьверы апячаталі, паведамляе арганізацыя.

12:37 16.2.2021

Старшыня БАЖ Андрэй Бастунец на волі

Ператрус на офісе Беларускай асацыяцыі журналістаў скончаны. Старшыня БАЖ Андрэй Бастунец ужо на волі. Ператрус ладзілі людзі з цалкам схаванымі тварамі, паведамляе Праваабарончы цэнтар «Вясна».

Андрэй Бастунец пасьля ператрусу. Менск, 16 лютага 2021году.
Андрэй Бастунец пасьля ператрусу. Менск, 16 лютага 2021году.

Старшыня БАЖ Андрэй Бастунец у камэнтары Свабодзе пасьля ператрусу, які скончыўся ў штаб-кватэры арганізацыі, сказаў, што застаецца на волі, не знаходзіцца пад падпіскай, але сілавікі папярэдзілі яго аб недапушчальнасьці раскрыцьця дэталяў ператрусу. Цяпер ён плянуе даведацца падрабязнасьці вобшукаў у сваіх калег, каб зразумець, што рабіць далей.

Загрузіць яшчэ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG