Лінкі ўнівэрсальнага доступу

Сілавікі выносяць абсталяваньне з офісу БАЖ у Менску, 16 лютага
Сілавікі выносяць абсталяваньне з офісу БАЖ у Менску, 16 лютага

Ператрусы ў журналістаў і праваабаронцаў, сьледчыя шукаюць доказы «фінансаваньня пратэстаў»

З раніцы 16 лютага сьледчыя прыйшлі ў кватэры і офісы праваабаронцаў, журналістаў, прадстаўнікоў незалежных прафсаюзаў па ўсёй краіне. Шукаюць матэрыялы аб фінансаваньні пратэстаў.

14:45 16.2.2021

Другі запар ператрус у юрыста ў Горадні

У юрыста і грамадзкага актывіста​ Алега Калінкова ў Горадні таксама прайшоў ператрус. Пра гэта ён паведаміў у фэйсбуку. Ператрус адбываецца ў рамках расьледваньня па актыкуле 342 Крымінальнай кодэксу (Арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх).

Гэта ўжо другі ператрус за апошнія некалькі дзён. Ператрусы былі як дома, так і на лецішчы Калінкова. Яны праходзілі ў межах справы па арт. 342 Крымінальнага кодэксу. Супрацоўнікі міліцыі вынялі тэхніку і дакументы.

Як паведамляе Hrodna.Life, у Калінкова пасьля ператрусу ў дзьвюх кватэрах, які пачаўся ў 7:30, забралі банкаўскія карткі, тэлефон, нататнік, статутныя дакумэнты па грамадзкім аб'яднаньні. Пастанова на ператрус была выпісаная яшчэ 1 лютага. «Апрача актыўнай грамадзкай дзейнасьці я займаюся справамі спажыўцоў як праваабаронца. Прыйшлі і пераглядзелі кожны аркушык у дакумэнтах», — расказаў Калінкоў.

14:43 16.2.2021

Юрыст «Вясны» Сапелка пасьля ператрусу на волі

Павел Сапелка паведаміў, што у яго дома адбыўся ператрус, была канфіскаваная ўся тэхніка. Ён на волі.

Але траіх праваабаронцаў «Вясны» затрымалі.

14:41 16.2.2021

БАЖ просіць пакуль ня сплачваць унёскі, могуць заблякаваць рахунак

Пасьля ператрусу ў офісе і кватэрах лідэраў арганізацыі БАЖ паведаміў, што ў сувязі з тым, што ў іх забралі пячатку і дакумэнты, просяць сябраў арганізацыі пакуль не аплочваць унёскі на рахунак арганізацыі, бо вялікая верагоднасьць таго, што рахунак будзе заблякаваны.

13:56 16.2.2021

Апячатаныя дзьверы офісу БАЖ пасьля ператрусу сілавікоў

13:53 16.2.2021

Пасьля ператрусу ў офісе БАЖ

Сьледчыя выносяць канфіскаваныя рэчы і дакумэнты з офісу БАЖ. 16 лютага.

13:43 16.2.2021

Затрымалі праваабаронцу «Вясны» Салаўёва

Прайшоў ператрус і ў праваабаронцы «Вясны» Зьмітра Салаўёва. У яго забралі тэлефон і ўсю тэхніку. Пры затрыманьні ў хаце Салаўёва выламалі дзьверы. Зьмітра затрымалі, паведамляе арганізацыя.

13:39 16.2.2021

Ператрус у офісе магілёўскай філіі «Вясны» працягваецца

Паводле Праваабарончага цэнтру «Вясна», ператрусы прайшлі ў сябраў Магілёўскай філіі арганізацыі Аляксея Колчына і Барыса Бухеля.

Каля 13.00 стала вядома, што Колчын і Бухель затрыманыя. Вядома, што Аляксея Колчына павезьлі на офіс «Магілёўскай Вясны» на ператрус.

13:28 16.2.2021

Намесьнік старшыні БАЖ Алег Агееў таксама на волі

У намесьніка старшыні БАЖ Алега Агеева дома раніцай таксама прайшоў ператрус. Ператрус быў вельмі скурпулёзны, паведамляе арганізацыя. Забралі тэхніку, грошы, пакінулі 120 рублёў. Алег на волі.

Крымінальную справу па арт. 342 КК РБ (Арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх) завёў Сьледчы камітэт, пастанову аб ператрусе выносіў маёр юстыцыі Папоў, дата - 2021/02/01. Намесьнік генеральнага пракурора санкцыянаваў ператрус.

13:11 16.2.2021

Ператрус прайшоў і ў рэчыцкага журналіста

Сілавікі правялі ператрус у Андрэя Мядзьведзева, журналіста-фрылансера з Рэчыцы, які супрацоўнічае з рознымі выданьнямі. Ператрус адбыўся ў рамках расьледваньня па актыкуле 342 Крымінальнай кодэксу (Арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх).

13:00 16.2.2021

Барыс Гарэцкі расказаў, як прайшоў ператрус

12:40 16.2.2021

Стэфановіч: «Тое, што адбываецца, – акцыя застрашваньня журналістаў і праваабаронцаў»

Намесьнік старшыні «Вясны», праваабаронца Валянцін Стэфановіч пракамэнтаваў БелаПАН сёньняшнія напады на журналістаў і праваабаронцаў па ўсёй краіне.

«Адзінае, што можна сказаць: мы ўсе выконваем свае праваабарончыя функцыі. Людзей на вуліцу выводзілі не мы, а ўсім вядомы дзеяч, які сінімі пальцамі трымаецца за ўладу. Людзі выходзілі на вуліцу не таму, што іх на гэта арганізоўвалі праваабаронцы або журналісты. Мы толькі працуем з наступствамі таго, што ў краіне адбываецца, а ўсю адказнасьць за тое, што адбываецца, натуральна, нясуць улады».

12:37 16.2.2021

Старшыня БАЖ Андрэй Бастунец на волі

Ператрус на офісе Беларускай асацыяцыі журналістаў скончаны. Старшыня БАЖ Андрэй Бастунец ужо на волі. Ператрус ладзілі людзі з цалкам схаванымі тварамі, паведамляе Праваабарончы цэнтар «Вясна».

Андрэй Бастунец пасьля ператрусу. Менск, 16 лютага 2021году.
Андрэй Бастунец пасьля ператрусу. Менск, 16 лютага 2021году.

Старшыня БАЖ Андрэй Бастунец у камэнтары Свабодзе пасьля ператрусу, які скончыўся ў штаб-кватэры арганізацыі, сказаў, што застаецца на волі, не знаходзіцца пад падпіскай, але сілавікі папярэдзілі яго аб недапушчальнасьці раскрыцьця дэталяў ператрусу. Цяпер ён плянуе даведацца падрабязнасьці вобшукаў у сваіх калег, каб зразумець, што рабіць далей.

12:33 16.2.2021

Ператрус у офісе БАЖ скончыўся, дзьверы апячаталі

З офіса БАЖ забралі сістэмны блок кампутара, тэчку з заявамі на ўступленьне новых сябраў арганізацыі. Прагледзелі ўсе працоўныя месцы, шафы. Дзьверы апячаталі, паведамляе арганізацыя.

12:32 16.2.2021

Што за арганізацыя БАЖ, куды прыйшлі сілавікі

Сярод тых, у каго сёньня адбываюцца ператрусы, кіраўнікі Беларускай асацыяцыі журналістаў. Зь ператрусам таксама прыйшлі ў офіс БАЖ. Беларуская асацыяцыя журналістаў дзейнічае з 1995 году, гэта недзяржаўная арганізацыя, якая аб’ядноўвае журналістаў, садзейнічае разьвіцьцю журналістыкі. З 1997 году БАЖ — асацыяваны сябра Міжнароднай фэдэрацыі журналістыкі. У 2006 годзе БАЖ прайшла дзяржаўную перарэгістрацыю ў Беларусі.

12:18 16.2.2021

Ператрусы ў валянтэрак у Берасьці

У Берасьці прышлі з ператрусамі да бацькоў валянтэрак Кацярыны Бажко і Ганны Багдановіч. Пакуль берасьцейскі праваабаронца Ўладзімер Вялічкін, не адказвае на тэлефанаваньні і ягоная жонка.​

12:11 16.2.2021

Ператрус у бацькі незалежнага журналіста ў Гомлі

Яўген Меркіс
Яўген Меркіс

У кватэры бацькі журналіста Яўгена Меркіса адбыўся ператрус. Забралі тэхніку (кампутары брата і бацькі, а таксама тэлефоны), паведамляе БАЖ.

12:05 16.2.2021

Сьвятлана Ціханоўская пракамэнтавала масавыя ператрусы

Яна параіла шукаць злачынцаў у офісах АМАПу, ГУБАЗіК і ўсіх адказных за рэпрэсіі.
«Гэта і ёсьць сапраўдны дзяржаўны крызіс, бо дзеля ўтрыманьня ўлады рэжым рэпрэсуе нават тых, хто абараняе правы людзей. Пакуль гэта адбываецца, у небясьпецы знаходзяцца ўсе беларусы».

Ціханоўская перакананая, што такімі дзеяньнямі Лукашэнка сам зьбірае матэрыялы справы для міжнароднага трыбуналу супраць сябе і набліжаных да яго. Ціханоўская сказала, што яе штаб перадаў інфармацыю ў Эўразьвяз і Раду ААН у правах чалавека з патрабаваньнем прыняць захады.

12:02 16.2.2021

Ператрус у валянтэра ў Гомлі

Ператрус прахозіць таксама ў гомельскага валянтэра Ільлі Міронава. Ён займаецца дапамогай тым, хто трапіў пад палітычны перасьлед ці па артыкуле 23.34 КаАП. Вядома, што ў Міронава забралі ўсю кампутарную тэхніку і тэлефоны

11:58 16.2.2021

«Рукі за сьпіну!» Ператрус у кватэры сына старшыні БАЖ

Сын кіраўніка Беларускай асацыяцыі журналістаў Арсеній Бастунец распавёў як да яго ў кватэру прыйшлі сілавікі, 7 чалавек са зброяй.

11:53 16.2.2021

Вядома пра 25 ператрусаў па ўсёй Беларусі

Агулам па Беларусі адбыліся і адбываюцца сама меней 25 ператрусаў у сябраў БАЖ, «Вясны» і прафсаюзу РЭП. Яны прайшлі ў Менску, Магілёве, Віцебску, Гомлі, Мазыры, Берасьці, Рэчыцы. Некалькі чалавек, зьвязаных са згаданымі арганізацыямі дагэтуль не выходзяць на сувязь. Гаворка, у прыватнасьці, пра юрыста «Вясны» Паўла Сапелку, берасьцейскага праваабаронцу Ўладзімера Вялічкіна. Магчыма, у іх кватэрах ці на офісах таксама ператрусы.

Загрузіць яшчэ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG