Сьвятлана Ціханоўская адрэагавала на інфармацыю пра магчымыя пляны ўладаў прадаць сыстэмаўтаваральныя беларускія прадпрыемствы.
«Я хачу нагадаць усім: „Беларуськалій“, „Гродна-Азот“ і БМЗ — гэта дзяржаўныя прадпрыемствы, і яны належаць народу Беларусі. Перамовы пра іх продаж паказваюць рэальную розьніцу паміж чалавекам, які хоча выратаваць дзяржаву, і злачынцам, які ратуе толькі свае кішэні, што пусьцеюць», — напісала Ціханоўская.
Яна лічыць, што Лукашэнка «гатовы пакінуць пасьля сябе нават выпаленую зямлю, калі гэта дасьць яму рэсурсы, каб далей удаваць зь сябе прэзыдэнта».
Ціханоўская адзначыла, што Лукашэнка — «гэта проста грамадзянін, які летась страціў сваю легітымнасьць», і што ўгоды зь ягоным рэжымам незаконныя.
«Усе ягоныя дамоўленасьці пра продаж заводаў ды іншых актываў будуць перагледжаны. А ўся дзяржаўная маёмасьць, якую ён вырашыў раздаць, вернецца да свайго ўладальніка — народу Беларусі», — падсумавала Ціханоўская.
Пры канцы студзеня швэдзкі эканаміст Андэрс Ослунд у інтэрвію Свабодзе заявіў, што Расея хацела б купіць «Беларуськалій», «Гродна-Азот» і «Нафтан».
Прэзыдэнт Расеі Ўладзімір Пуцін хоча, каб «Уралкалий» і «Уралхим» набылі «Беларуськалій» і «Гродна-Азот». Гэта павінна быць танна, бо альтэрнатыўных пакупнікоў няма, — казаў Ослунд.