Дзяржаўны абвінаваўца папрасіў суд пакараць палітвязьня Паўла Сьпірына 4 з паловай гадамі зьняволеньня ў калёніі агульнага рэжыму.
У Менскім гарадзкім судзе працягваецца працэс над 36-гадовым блогерам Паўлам Сьпірыным. Яго абвінавачваюць паводле часткі 1 артыкула 130 Крымінальнага кодэксу за «наўмысныя дзеяньні, накіраваныя на распальваньне сацыяльнай варожасьці паводле прыкметы сацыяльнай прыналежнасьці».
Яму прад’яўлена абвінавачаньне па двух відэаблогах на ютубe. Гэта фільм «Грань» пра наркагандаль у Беларусі. Фільм быў занесены ў сьпіс экстрэмісцкіх матэрыялаў. А таксама блог «Жудасная таямніца генпракурора Беларусі. Карт-блянш на садызм» пра падзеі 9 жніўня і гвалт амапаўцаў супраць мірных дэманстрантаў.
Паўла Сьпірына трымаюць у клетцы, пад аховай шасьці супрацоўнікаў міліцыі.
На пачатку працэсу блогер адмовіўся ад адваката. Разглядае справу судзьдзя Дзіна Кучук.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў