Валерыя Есіпёнка асудзілі на 15 дзён арышту, ягоную жонку Алену аштрафавалі на 870 рублёў, паведаміла «Наша ніва».
«У мяне было чатыры суды па трох пратаколах, — расказала Алена. — Я знаёмілася з тым, у чым мяне абвінавачваюць, толькі на судах: там то адзіночнае пікетаваньне было, то масавае, і ў выніку пратаколы пастаянна адпраўлялі на дапрацоўку. Я думала, што гэтая эпапэя ня скончыцца, таму канкрэтны прысуд за нібыта ўдзел у масавым мерапрыемстве стаў ужо палёгкай. Валеру ж далі 15 сутак, ён пачувае сябе добра, трымаецца малайцом».
Жанчыну адпусьцілі толькі пасьля 20-й гадзіны 29 студзеня: трое сутак з моманту яе затрыманьня скончыліся яшчэ ў 14:40.
У Есіпёнкаў двое непаўналетніх дзяцей. Пакуль бацькоў не было дома, яны знаходзіліся зь сястрой Алены.
«Самым цяжкім было жыцьцё ў невядомасьці: калі ты ня ведаў, што адбываецца і што цябе чакае. А так мы ўсё вытрымаем, усё нармалёва», — сказала Алена.
26 студзеня Валера Есіпёнка выклікалі ў аддзел барацьбы з эканамічнымі злачынствамі. Пасьля адказаў на пытаньні яго адпусьцілі. Але ў гэты у краме «Мой модны кут» міліцыянты затрымалі яго жонку Алену. Адной з прычын затрыманьня, як сказалі відавочцы, назвалі гандаль «незарэгістраванай сымболікай».
Напярэдані затрыманьня ў краму прыйшла праверка МНС, якая выявіла парушэньні.
28 студзеня Валера Есіпёнка затрымалі, калі ён прыйшоў на суд над сваёй жонкай.
Цяпер крама не працуе.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў