Лінкі ўнівэрсальнага доступу

ФСБ Расеі патлумачыла беспалётную зону над «палацам Пуціна» процідзеяньнем замежным выведкам


Расьсьледаваньне ФБК пра аб'ект стала самым папулярным расейскім дакумэнтальным фільмам у гісторыі

ФСБ патлумачыла зьяўленьне беспалётнай зоны над палацам каля Геленджыка ўзрастаньнем актыўнасьці замежных выведак. Пра гэта спэцслужба заявіла ў адказе на запыт рэдакцыі РБК.

Раней гэты палац зьвязалі ў СМІ з прэзыдэнтам Расеі Ўладзімірам Пуціным. Расьсьледаваньне Фонду барацьбы з карупцыяй пра гэты аб’ект паглядзелі 95 мільёнаў разоў.

Беспалётная зона ў раёне мысу Ідокапас была вызначана загадам Міністэрства транспарту ад 24 лiпеня 2020 году ў інтарэсах памежнай бясьпекі, сьцьвярджаецца ў адказе ФСБ.

Як забарона на пералёты ўнутры краіны дапамагае абараняцца ад замежных выведных службаў, у дакумэнце не ўдакладняецца. Забароны на праходжаньне лодак у раёне мысу няма, настойваюць у ведамстве.

Насамрэч абмежаваньні палётаў былі ўведзеныя яшчэ ў 2011 годзе.

У Фэдэральнай службе аховы газэце заявілі, што не ахоўваюць аб’ектаў у раёне палацу, якія прыпісваюць Пуціну. У ФСА таксама дадалі, што на той тэрыторыі ня ўводзілася якіх-небудзь забаронаў і абмежаваньняў. Раней Радыё Свабода высьветліла, што кампанія, якая займаецца аб’ектамі спэцсувязі для асоб, якіх ахоўвае ФСА, працавала на будаўніцтве дома пад Геленджыком.

Аб будаўніцтве дома стала вядома ў сьнежні 2010 году з адкрытага ліста бізнэсоўца Сяргея Калесьнікава прэзыдэнту Дзьмітрыю Мядзьведзеву. Ён тады заявіў, што хацеў зьвярнуць увагу прэзыдэнта і расейцаў на карупцыю ў краіне.

Прэс-служба Крамля сувязь аб’екта з Пуціным заўсёды адмаўляла. 25 студзеня гэта зрабіў і сам прэзыдэнт. У той жа час выданьне «Праект» са спасылкай на крыніцы сярод расейскіх чыноўнікаў сьцьвярджае, што менавіта ў гэтай рэзыдэнцыі кіраўнік дзяржавы сустракаецца з сваім атачэньнем і бавіць «значную частку свайго нефармальнага часу».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG