Як паведамляе выданьне Delfi, даручэньне ўтрымліваецца ў пераліку, апублікаваным Крамлём па выніках пасяджэньня Рады па культуры і мастацтва.
Заканадаўчую норму мяркуецца ўнесьці ў фэдэральны закон «Аб увекавечаньні перамогі савецкага народа ў Вялікай Айчыннай вайне 1941-1945 гадоў».
Адказным прызначаны сьпікер Дзяржаўнай думы Вячаслаў Валодзін, а тэрмінам выкананьня даручэньня пазначаны 1 ліпеня 2021 года. Законапраект даручана падрыхтаваць пры ўдзеле арганізацыйнага камітэта «Перамога».
У кастрычніку 2020 года на пасяджэньні Рады па культуры і мастацтва было ўзьнятае пытаньне аб узмацненьні адказнасьці за атаясамліваньне дзеяньняў СССР і нацысцкай Нямеччыны. З гэтай прапановай выступіла кіраўнік камітэту Дзярждумы па культуры Алена Ямпольскага.
Пуцін зь ёй пагадзіўся. «Калі ў некаторых краінах за адмаўленьне генацыду армян прадугледжана крымінальнае пакараньне, нам сам Бог загадаў, напэўна, уключаць адпаведныя мэханізмы для абароны зусім нядаўняга мінулага», —цытуе словы Пуціна на тым пасяджэньні ВВС.
У траўні таго ж года дэпутат Думы Аляксей Жураўлёў прапанаваў забараніць прыраўноўваньне ідэалёгіі СССР да нацызму.
- Тэма адказнасьці, нароўні з кіраўніцтвам нацысцкай Нямеччыны, кіраўніцтва СССР і пэрсанальна Сталіна за разьвязваньне Другой сусьветнай вайны, у тым ліку і праз падпісаньне «пакту Молатава-Рыбэнтропа» абмяркоўваецца з пачатку 90-х гадоў, калі на нейкі час прыадчыніліся раней сакрэтныя архівы былога СССР. Дыскусіі ідуць як у навуковых гістарычных колах, гэтак і ў грамадзтве. Пакуль невядома, што будзе зь цяпер ужо даволі аб’ёмнай літаратурай на гэтую тэму, якая выйшла ў апошнія дзесяцігодзьдзі, калі прапанаваны Пуціным закон будзе прыняты. Таксама няясна, ці патрапяць пад ягонае дзеяньне заходнія гісторыкі, якія лічаць, што адказнасьць за самую кровапралітную ў гісторыі чалавецтва вайну Гітлер і Сталін павінны падзяліць разам.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў