Па якім менавіта артыкуле абвінавачваюць Аляксандрава, невядома, бо адвакатка знаходзіцца пад падпіскай аб неразгалошваньні.
Аднак, як паведаміў 15 студзеня намесьнік міністра ўнутраных спраў Генадзь Казакевіч, у дачыненьні да журналіста распачатая справа па ч. 2 арт. 342 Крымінальнага кодэксу (арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх). Ён падазраецца ў фінансаваньні пратэставай дзейнасьці.
«Адчувае Андрэй сябе добра, усё неабходнае ў яго ёсьць, усяго хапае. Сукамэрнікі цалкам адэкватныя, умовы нармальныя», — адзначыла адвакат.
Андрэй Аляксандраў і яго дзяўчына Ірына Злобіна былі затрыманыя 12 студзеня па падазрэньні ў фінансаваньні пратэставай дзейнасьці — у прыватнасьці ў тым, што аплачвалі штрафы людзей, затрыманых падчас акцый, кампэнсавалі кошт іх утрыманьня ў ЦІП і ізалятарах. Паводле інфармацыі МУС, неабходныя для гэтага сродкі яны атрымлівалі з-за мяжы.
14 студзеня ў офісе БелаПАН, дзе Аляксандраў працаваў намесьнікам дырэктара ў 2014–2018 гадах, прайшоў трохгадзінны ператрус у рамках расьсьледаваньня справы, заведзенай па артыкуле 342 КК у дачыненьні да Аляксандрава. Канфіскаваныя рукапісныя запісы, фінансавая дакумэнтацыя, каля дзесяці жорсткіх дыскаў працоўных кампутараў, жорсткі дыск сэрвэра лякальнай сеткі.
Беларускія праваабарончыя арганізацыі абвясьцілі Аляксандрава і Злобіну палітычнымі вязьнямі.
