Лінкі ўнівэрсальнага доступу

У Гомлі за «масавыя беспарадкі» судзяць непаўналетняга


Мікіта Залатароў (у цэнтры) падчас суду
Мікіта Залатароў (у цэнтры) падчас суду

Суд Чыгуначнага раёну Гомля 18 студзеня пачаў разгляд крымінальнай справы аб «масавых беспарадках» і «гвалце адносна міліцыі».

Абвінавачаныя — трое жыхароў Гомля, Гомельскага раёну і Добруша. Сярод іх — 17-гадовы Мікіта Залатароў, які хварэе на эпілепсію і з 11 жніўня ўтрымліваецца ў СІЗА. Вядзе працэс судзьдзя Дзьмітры Дэбой.

На момант затрыманьня Мікіту Залатарову было 16 гадоў. Ягоны бацька сьведчыў, што пасьля затрыманьня падлетак быў моцна зьбіты і трапіў у рэанімацыю. Скаргі на зьбіцьцё ў сьледчыя органы не прынесьлі плёну — завесьці крымінальную справу адмовіліся.

Паводле вэрсіі абвінавачаньня, якую агучыў Яўген Фартушняк, 28-гадовы жыхар Гомельскага раёну Леанід Кавалёў вырабіў «кактэйлі Молатава» і прапанаваў 25-гадоваму жыхару Добруша Дзьмітрыю Карнееву і 16-гадоваму гамельчуку Мікіту Залатарову іх выкарыстаць на акцыях пратэсту. Па вэрсіі сьледчых, «падазроныя паводзіны маладых людзей прыцягнулі ўвагу супрацоўнікаў міліцыі, якія накіраваліся да іх з мэтай праверкі, і тыя ўцяклі». Адзін зь іх кінуў бутэльку ў бок міліцыянтаў.

Абвінавачаныя (зьлева направа) Леанід Кавалёў, Мікіта Залатароў і Дзьмітры Карнееў
Абвінавачаныя (зьлева направа) Леанід Кавалёў, Мікіта Залатароў і Дзьмітры Карнееў

Апроч абвінавачаньня ва ўдзеле ў масавых беспарадках, гвалце адносна міліцыі, незаконных дзеяньнях з гаручымі рэчывамі, Леаніда Кавалёва абвінавачваюць ва «ўцягваньні непаўналетняга ў супрацьпраўныя паводзіны».

Пацярпелыя па крымінальнай справе — кантрактнікі ўнутраных войскаў (частка № 5525) Аляксей Канаваленка і Яўген Раманькоў.

Пацярпелыя міліцыянты ў судзе (у першым шэрагу)
Пацярпелыя міліцыянты ў судзе (у першым шэрагу)

«Плянавалі пагромы, падпалы, збройны супраціў»

Паводле зачытанага абвінавачаньня, Леанід Кавалёў «з мэтай выканаць публічныя заклікі да масавых беспарадкаў», якія былі разьмешчаны ў Telegram і Youtube, шукаў саўдзельнікаў плянаванага злачынства, вырабіў «кактэйлі Молатава» з мэтай «незаконных спосабаў выказваньня сваіх грамадзка-палітычных поглядаў». Злачынныя дзеяньні, заплянаваныя Кавалёвым, па вэрсіі абвінавачаньня — гэта, сярод іншага, «гвалт, пагромы, падпалы, зьнішчэньне маёмасьці, збройны супраціў прадстаўнікам улады, правакацыі, накіраваныя на распальваньне агрэсіўнасьці натоўпу».

«Кактэйлі Молатава» перавозіў на нявызначаным транспарце ў нявызначанае месца»

«Кактэйлі Молатава», па вэрсіі сьледзтва, Кавалёў захоўваў у нявызначаных месцах, потым перамясьціў на «нявызначаным транспарце» ў «нявызначанае месца ў цэнтры гораду».

Паводле абвінаваўцы, маладыя людзі нібыта зьбіраліся прымяніць «кактэйлі Молатава», каб нанесьці пашкоджаньні ці спэцыяльнаму транспарту, ці міліцыянтам. Але вайскоўцы часткі № 5525 «мелі абгрунтаваныя падазрэньні ў дачыненьні да гэтых асоб, таму імкліва наблізіліся да іх, што не дало ім рэалізаваць свае злачынныя пляны». Абвінавачаныя ўцяклі, але нібыта кінулі ў бок вайскоўцаў «кактэйль Молатава». Бутэлька разьбілася аб асфальт.

Паводле дзяржаўнага абвінаваўцы, свае дзеяньні на акцыі пратэсту Дзьмітры Карнееў зьняў на мабільны тэлефон і пазьней выклаў у інтэрнэт «з мэтай прапаганды гвалту супраць супрацоўнікаў міліцыі».

Леанід Кавалёў і Мікіта Залатароў цалкам адкідаюць абвінавачаньні. Дзьмітрый Карнееў часткова іх прызнае.

Гэта публікацыя падрыхтаваная з выкарыстаньнем інфармацыі БелаПАН.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG