Лінкі ўнівэрсальнага доступу

Два гады калёніі за тое, што ўпаў на нагу супрацоўніку ДАІ


Сёньня абвясьцілі прысуд па крымінальнай справе ў дачыненьні да Аляксандра Захарэвіча, якога абвінавачвалі ва ўжываньні гвалту да супрацоўніка ўнутраных спраў.

Як паведамляе праваабарончы цэнтар «Вясна», справу разглядала судзьдзя суду Першамайскага раёну Менску Анастасія Кулік.

Захарэвіч быў прызнаны вінаватым і асуджаны на два гады пазбаўленьня волі з адбываньнем пакараньня ў калёніі агульнага рэжыму. Сваёй віны ён не прызнаў.

Аляксандра Захарэвіча затрымалі 1 лістапада падчас мірнай акцыі пратэсту «Дзяды». Суд Першамайскага раёну прысудзіў яму 9 сутак адміністрацыйнага арышту. Захарэвіча этапавалі ў СІЗА-6 г. Баранавічы для адбыцьця пакараньня.

Пры затрыманьні ён быў зьбіты, што відаць на відэазапісе, апублікаваным ініцыятывай @By_Pol.

10 лістапада пры вызваленьні з СІЗА-6 Аляксандра Захарэвіча затрымалі супрацоўнікі міліцыі, адвезьлі яго на легкавым аўтамабілі дадому, дзе правялі ператрус. Пазьней яму прад’явілі абвінавачваньне па артыкуле 364 Крымінальнага кодэксу — «Гвалт альбо пагроза прымяненьня гвалту ў дачыненьні да супрацоўніка органаў унутраных спраў».

У віну Аляксандру Захарэвічу ставіўся напад на супрацоўніка ДАІ пры выкананьні ім службовых абавязкаў. Затрыманьне мужчыны трапіла на відэа, дзе можна бачыць, як ён бяжыць, адбываецца сутыкненьне, пасьля чаго ён падае і закранае нагу супрацоўніка ДАІ.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG