Акцыі пратэсту ў выходныя і сьвяточныя дні былі малалюднымі, у Менску затрымалі 40 чалавек, паведаміла агенцтву «Інтэрфакс-Захад» афіцыйны прадстаўнік МУС Вольга Чамаданава.
«У асноўным грамадзяне зь незарэгістраванай сымболікай рабілі кароткатэрміновыя „маршы“ па дваровых тэрыторыях, не забываючы пры гэтым фатаграфавацца і выкладваць фота ў сеткі з камэнтарамі аб удзеле ў масавых акцыях».
Яна дадала, што акцыі праводзіліся ў розных месцах Менску: людзі зьбіраліся ў групы, выстройваліся ланцужкамі, ладзілі адзінкавыя пікеты.
У цэлым абстаноўка ў краіне ў сьвяточныя дні, паводле ацэнак МУС, была спакойнай і кантраляванай. Па словах Чамаданавай, супрацоўнікі міліцыі і вайскоўцы ўнутраных войскаў МУС «забясьпечылі максымальнае рэагаваньне» на ўсе паведамленьні грамадзянаў аб злачынствах і здарэньнях, а таксама «прынялі неабходныя меры для гарантаваньня грамадзкай бясьпекі ў месцах правядзеньня нешматлікіх і маламаштабных несанкцыянаваных акцыяў і пікетаў».
Тым часам праваабаронцы ў сваіх падліках за 7-10 студзеня назвалі больш затрыманых, чым МУС, — 42 чалавекі, пры гэтым адзначыўшы, што сьпіс няпоўны і будзе дапаўняцца.
Пратэсты супраць кіраваньня Лукашэнкі працягваюцца ў Беларусі 155 дзён запар.
