Гэта другая вакцына ад каранавірусу, якая атрымала рэкамэндацыю ЕМА пасля Pfizer / BioNTech, з якой пачалася кампанія вакцынацыі ад COVID-19 ў Эўразьвязе.
Цяпер вакцына мусіць атрымаць ухваленьне ўладаў Эўразьвязу. Па словах кіраўніка Эўракамісіі Ўрсулы фон дэр Ляйен, цяпер у Эўракамісіі «поўным ходам працуюць над тым, каб зацьвердзіць гэтае рашэньне і зрабіць вакцыну даступнай у ЭЗ».
Фон дэр Ляйен дадала, што на сёньня Эўропа заручылася 2 млрд доз прэпаратаў для прышчэпкавай кампаніі — больш чым дастатковай колькасьцю «для абароны нас усіх». На 2020 год насельніцтва Эўропы дасягала 695 млн чалавек.
Што вядома пра вакцыну Moderna
Клінічныя выпрабаваньні даказалі прыдатнасьць вакцыны для людзей, старэйшых за 18 гадоў, паведамляе ЕМА. У выпрабаваньнях прынялі ўдзел каля 30 тысяч валянтэраў. Яе эфэктыўнасьць склала 94 працэнты ў агульных выпадках, а з гледжаньня процідзеяньня сьмяротнага зыходу — 100 працэнтаў.
Прэпарат трэба ўводзіць двума дозамі ўколам у руку з інтэрвалам у 28 дзён. У ліку самых распаўсюджаных пабочных эфэктаў — ацёк у месцы ўколу, галаўны боль, боль у цягліцах, млоснасьць, адчуваньне стомленасьці, падвышэньне тэмпэратуры і інш. Як правіла, гэтыя эфэкты праходзяць праз некалькі дзён.
ЭЗ адстае з вакцынацыяй
З 27 сьнежня 2020 года ў ЭЗ праходзіць вакцынацыя з выкарыстаньнем прэпарата нямецкай кампаніі BioNTech і амэрыканскай Pfizer.
Эўразьвяз пачаў закупку вакцын пазьней ЗША, Японіі, Канады, Ганконга і іншых краін, адзначае часопіс Spiegel.
Вашынгтон пачаў закупкі ў ліпені, Брусэль — у сярэдзіне лістапада. Фармальна ЭЗ замовіў каля двух мільярдаў доз вакцыны, аднак вялікая частка прыпадае на прэпараты брытанскай AstraZeneca і францускай Sanofi, які не дайшоў да трэцяй стадыі выпрабаваньняў. У Вялікабрытаніі і ЗША ўжо вакцынавалі 600 тысяч і каля двух мільёнаў чалавек адпаведна, адзначае агенцтва Bloomberg.
У Беларусі пачалася вакцынацыя расейскім прэпаратам «Спутник V».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў