Лінкі ўнівэрсальнага доступу

Палітзьняволенай журналістцы Кацярыне Андрэевай не дазволілі спаткацца з мужам


Кацярына Андрэева (у цэнтры) падчас працы

Кацярыне Андрэевай, абвінавачанай паводле ч. 1 арт. 342 Крымінальнага кодэксу (арганізацыя і падрыхтоўка дзеяньняў, якія груба парушаюць грамадзкі парадак), адмовілі ў спатканьні з мужам.

Адпаведную пастанову з подпісам старшага сьледчага Фрунзэнскага раённага аддзяленьня Сьледчага камітэту Ігара Курыловіча атрымаў муж Кацярыны, журналіст Ігар Ільяш.

Як перадае тэлеканал Белсат, сьледчы патлумачыў адмову тым, што Кацярына нібыта «можа схавацца ад органаў крымінальнага перасьледу і суду».

«Лічу пастанову неабгрунтаванай, а матывавальную частку гэтай пастановы — пазбаўленай усялякага сэнсу. У сваім хадайніцтве я прасіў не аб зьмене меры стрыманьня для Каці, а толькі аб спатканьні», — камэнтуе сытуацыю Ігар Ільяш.

Таксама Фрунзэнскі РАСК адмовіўся вяртаць тэхніку, якую канфіскавалі падчас затрыманьня Ільяша ў кватэры 24 лістапада. Тады журналіста пакаралі 15 днямі арышту, а на падставе пастановы аб арышце маёмасьці Кацярыны Андрэевай забралі і асабістую тэхніку яе мужа — два тэлефоны і ноўтбук.

Сьледчы Курыловіч адмовіўся вяртаць тэхніку, бо прадметы прызнаныя «рэчавымі доказамі» ў справе журналістак «Белсату» Кацярыны Андрэевай і Дар’і Чульцовай. Абедзьвюх затрымалі падчас падрыхтоўкі сюжэту з «Маршу сьмелых» 15 лістапада.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG