Лінкі ўнівэрсальнага доступу

Новы амбасадар Францыі ўручыў копіі даверчых граматаў Макею


Амбасадар Францыі Нікаля дэ Лякост і Ўладзімер Макей, 8 сьнежня 2020 г.
Амбасадар Францыі Нікаля дэ Лякост і Ўладзімер Макей, 8 сьнежня 2020 г.

Новы пасол Францыі Нікаля дэ Лякост ўручыў копіі даверчых граматаў міністру замежных справаў Беларусі Ўладзімеру Макею, паведамляе прэс-служба беларускага МЗС.

Сустрэча адбылася 8 сьнежня. Бакі абмеркавалі «стан беларуска-францускіх дачыненьняў, а таксама актуальныя пытаньні міжнароднага парадку дня». Макей пажадаў новаму амбасадару плённай працы ў Беларусі.

Дэ Лякост прыбыў у Беларусь 30 лістапада, паведамілі БелаПАН у пасольстве Францыі. Да яго францускую дыпляматычную місію ў Беларусі зь верасьня 2016 да кастрычніка 2020 году ўзначальваў Дзідзье Канэс.

56-гадовы Нікаля дэ Лякост быў прызначаны амбасадарам у Беларусь дэкрэтам прэзыдэнта Францыі Эманюэля Макрона ад 14 верасьня. Да прызначэньня ў Менск ён займаў пасаду намесьніка дырэктара ў кантынэнтальнай Эўропе галоўнай управы палітыкі й бясьпекі міністэрства Эўропы і замежных справаў. У 2012–2016 гадах працаваў першым дарадцам пасольства Францыі ў Расеі.

Цяперашняя ратацыя амбасадараў адбылася падчас абвастрэньня адносінаў афіцыйнага Менску зь дзяржавамі ЭЗ, у тым ліку з Францыяй, якая не прызнае вынікі прэзыдэнцкіх выбараў і Аляксандра Лукашэнку ў якасьці прэзыдэнта.

27 верасьня ў інтэрвію Le Journal du Dimanche Эманюэль Макрон назваў становішча ў Беларусі «крызысам аўтарытарнай улады» і заявіў, што Лукашэнка павінен сысьці. 29 верасьня падчас афіцыйнага візыту ў Вільню Макрон сустрэўся з экс-кандыдаткай у прэзыдэнты Беларусі Сьвятланай Ціханоўскай. На сустрэчы ён усклаў надзеі на ўрэгуляваньне палітычнага канфлікту ў Беларусі на пасярэдніцтва АБСЭ.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG