Лінкі ўнівэрсальнага доступу

Fars: Іранскага фізыка забілі зброяй з дыстанцыйным кіраваньнем


Iранскі навуковец-ядзернік Махсэн Фахрызадэ

Іранскае агенцтва Fars апублікавала новыя вынікі расьсьледаваньня абставінаў, пры якіх быў забіты «бацька іранскай ядзернай бомбы» Махсэн Фахрызадэ. Агенцтва сьцьвярджае, што яго расстралялі з аўтаматычнай зброі з дыстанцыйным кіраваньнем.

Згодна з новай вэрсіяй, аўтамабіль Махсэна Фахрызадэ заехаў у Абсард (прадмесьце Тэгерану) у суправаджэньні дзьвюх машын аховы. Першы з аўтамабіляў выехаў наперад, правяраючы бясьпеку дарогі. Калі першы аўтамабіль быў за некалькі кілямэтраў ад машыны фізыка-ядзерніка, па картэжы быў адкрыты агонь з кулямёта з дыстанцыйным кіраваньнем. Кулямёт стаяў у кодабе прыпаркаванага на ўзбочыне мінівэна Nissan.

Махсэн Фахрызадэ, пачуўшы ўдары куляў аб кодаб свайго аўтамабіля, не зразумеў, што адбылося. Ён вырашыў, што пабочны гук быў ад сутыкненьня зь перашкодай або няспраўнасьці рухавіка, выйшаў з машыны праверыць і апынуўся пад градам куляў. У гэты момант ахоўнік з другога аўтамабіля разьвярнуў яго, каб перагарадзіць доступ да машыны вучонага, і амаль адразу ж быў забіты. Празь некалькі імгненьняў аўтамабіль Nissan выбухнуў. Выбух быў настолькі моцны, што прычыніў шкоду дрэвам і аўтамабілям у радыюсе 500 мэтраў. Пасьля нападу Фахрызадэ даставілі ў шпіталь, дзе ён неўзабаве памёр.

Агенцтва піша, што інцыдэнт працягваўся каля трох хвілін. Нападнікам не давялося ўцякаць зь месца здарэньня, бо іх там не было, а ўся апэрацыя праводзілася дыстанцыйна. Уладальнік мінівэна пакінуў Іран яшчэ 29 кастрычніка.

Аўтамабіль, у якім ехаў Фахрызадэ
Аўтамабіль, у якім ехаў Фахрызадэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG