Лінкі ўнівэрсальнага доступу

Яшчэ адна вакцына супраць COVID-19 паказала высокую эфэктыўнасьць


Ілюстрацыйнае фота

Кампанія AstraZeneca абвясьціла, што эфэктыўнасьць вакцыны ад каранавіруснай інфэкцыі новага тыпу, якую яна распрацоўвае разам з Оксфардзкім унівэрсытэтам, складае 70%.

У ходзе тэстаў правяраліся два варыянты ўвядзеньня вакцыны, якія прадэманстравалі розную эфэктыўнасць, гаворыцца ў паведамленьні.

У першым выпадку амаль тры тысячы чалавек спачатку атрымалі вакцыну ў палавіннай дозе, а празь месяц у поўнай. Такі спосаб вакцынацыі паказаў эфэктыўнасьць 90 адсоткаў. Варыянт з паўторным увядзеньнем поўнай дозы з розьніцай у месяц у амаль 9 тысяч добраахвотнікаў паказаў эфэктыўнасць ў 62 адсоткі. Такім чынам, з улікам абодвух тэстаў сярэдняя эфэктыўнасць вакцыны, распрацаванай AstraZeneca, складае 70 працэнтаў, адзначаецца ў паведамленьні кампаніі.

У прэс-рэлізе асабліва падкрэсьліваецца, што вакцына AstraZeneca можа захоўвацца пры тэмпэратуры ад 2 да 8 градусаў па Цэльсію, а правядзеньне вакцынацыі не патрабуе нейкіх асаблівых умоў.

AstraZeneca гатова вырабіць да 3 мільярдаў доз вакцыны ў 2021 годзе, калі яе распрацоўка будзе дазволена да ўжываньня.

18 лістапада карпарацыя Pfizer заявіла аб завяршэньні клінічных выпрабаваньняў вакцыны ад каранавіруснай інфэкцыі COVID-19, якую яна распрацавала сумесна з нямецкай BioNTech. Паказьнік эфэктыўнасьці вакцыны аказаўся яшчэ больш высокім, чым ацэньвалася раней — не 90 адсоткаў, але 95. Пры гэтым у гэтай вакцыны ёсьць сур’ёзны недахоп — яна патрабуе захоўваньня і транспартаваньня пры тэмпэратуры мінус 70 градусаў.

Таксама ў лістападзе амэрыканская кампанія Moderna паведаміла, што яе вакцына ад новага каранавірусу паказала эфэктыўнасць у 94,5 працэнта на трэцяй стадыі выпрабаваньняў. Расійскі інстытут імя Гамалііл, у сваю чаргу, паведаміў, што яго распрацоўка «Sputnik V» дэманструе 92-працэнтную эфэктыўнасьць. Пры гэтым расейская вакцына ўжо зарэгістраваная, хоць трэцяя фаза яе клінічных выпрабаваньняў яшчэ не завершаная.

Moderna папярэдне ацэньвае кошт адной дозы сваёй вакцыны ад 25 да 37 даляраў, Pfizer — прыкладна ў 18 даляраў. Распрацоўнікі Sputnik V заявілі, што іхная вакцына будзе нашмат таньнейшай. AstraZeneca таксама паведамляе, што яе вакцына будзе таньней, чым у асноўных канкурэнтаў, але не называе дакладны кошт.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG