Лінкі ўнівэрсальнага доступу

Кіраўнік фэдэрацыі Даніі: Калі гісторыя з Баскавым акажацца праўдай, то гэта несумяшчальна з правядзеньнем ЧС


Кіраўнік хакейнай фэдэрацыі Даніі Генрык Бак Нільсэн сказаў, што калі пацьвердзіцца гісторыя з Баскавым, то правядзеньне чэмпіянату сьвету ў Беларусі «будзе падобным да падліваньня бэнзіну ў агонь», цытуе яго Tribuna з спасылкай на DR.

«Я сам на гэтым тыдні прысутнічаў на пасяджэньнях Міжнароднай фэдэрацыі хакею. І я магу выразна сказаць, што мы не перанесьлі чэмпіянат сьвету зь Беларусі ў Расею.

На падставе экспэртнага заключэньня мы абмеркавалі ўсе магчымыя варыянты, што тычацца чэмпіянату сьвету па хакеі ў Беларусі. Але нічога ня вырашана. Мы ня будзем весьці перамовы зь іншымі краінамі, пакуль не дамовімся пра перанос чэмпіянату сьвету. Але мы яшчэ не прынялі рашэньне.

Для мяне бясьпека і здароўе гульцоў і заўзятараў маюць найвышэйшы прыярытэт. Але сытуацыя ў Беларусі не супакоілася.

І калі гісторыя з Баскавым акажацца праўдай, то абсалютна відавочна, што гэта несумяшчальна з правядзеньнем чэмпіянату сьвету па хакеі ў Беларусі. Гэта будзе падобна да падліваньня бэнзіну ў агонь. Але пакуль я чуў пра гэтую гісторыю толькі з СМІ. Гэтага мы яшчэ не абмяркоўвалі ў IIHF», — сказаў Нільсэн.

Чэмпіянат сьвету па хакеі мае прайсьці з 21 да 6 чэрвеня 2021 году. У арганізацыі ёсьць каля 4 месяцаў да пачатку турніру, каб дакладна вызначыцца з краінамі-ўдзельніцамі. Такім чынам, канчатковага рашэньня варта чакаць да канца студзеня.

Герасіменя: Неўзабаве мы адправім у МАК заяву пра ролю Баскава ў забойстве Бандарэнкі

Трохразовая алімпійская мэдалістка і кіраўніца Фонду спартовай салідарнасьці Аляксандра Герасіменя паведаміла, што фонд зьбіраецца адправіць у Міжнародны алімпійскі камітэт заяву пра ролю кіраўніка Фэдэрацыі хакею Беларусі Дзьмітрыя Баскава ў забойстве Рамана Бандарэнкі, піша Tribuna з спасылкай на DR.

«У найбліжэйшы час мы адправім у МАК заяву пра ролю Дзьмітрыя Баскава ў справе аб забойстве Бандарэнкі.

На гэты момант мы перадалі дакумэнты пра тое, што сем спартоўцаў зазналі дыскрымінацыю з боку НАК Беларусі. Таксама працуем над дакумэнтаваньнем іншых выпадкаў», — сказала Герасіменя.

Дзьмітры Баскаў таксама ёсьць сябрам выканкаму Нацыянальнага алімпійскага камітэту Беларусі.

Пра магчымы перанос чэмпіянату сьвету ўперўыню напісаў у Твітэры журналіст The Hockey News Раян Кэнэдзі.

Паводле Кэнэдзі, неўзабаве кіраўнік міжнароднай хакейнай фэдэрацыі Рэнэ Фазэль мае паехаць у Расею, каб абмеркаваць з прэзыдэнтам Фэдэрацыі хакею Расеі Ўладзіславам Трацьцяком пытаньне пераносу матчаў зь Менску ў Маскву. Рыга захавае статус гаспадара чэмпіянату.

Віцэ-прэзыдэнт IIHF Кумала Калерва пазьней у этэры MTV Urheilun гэтыя зьвесткі зьняпраўдзіў. Ён сказаў, што міжнародная фэдэрацыя не абмяркоўвала перанос чэмпіянату ў Маскву.

На ягоную думку, «было б абсурдам», калі б матчы ў Беларусі аддалі Расеі, з увагі на тое, што Расея падтрымала Аляксандра Лукашэнку падчас пратэстаў у Беларусі.

Да таго ж, паводле ягонай інфармацыі, Уладзімір Трацьцяк цяпер у Цюрыху, таму Рэнэ Фазэль прынамсі пакуль не паедзе ў Расею, каб зь ім сустрэцца.

18 лістапада Міжнародная фэдэрацыя хакею прызнала, што ў Беларусі ёсьць праблемы зь бясьпекай і статыстыкай распаўсюду каранавірусу. Афіцыйна фэдэрацыя заявіла, што ёй патрэбна болей часу, каб вырашыць, ці пераносіць чэмпіянат зь Беларусі.

Кіраўнік IIHF Рэнэ Фазэль адзначыў, што калі б чэмпіянат трэба было правесьці цяпер, то ў Беларусі і Латвіі зрабіць гэта было б нерэальна.

Разам з тым Фазэль заявіў, што трэба зрабіць усё магчымае, «каб правесьці турнір з выбранымі гаспадарамі».

Латвія ўжо заявіла, што гатовая правесьці чэмпіянат сама. І забараніла ўезд старшыню беларускай фэдэрацыі хакею Дзьмітрыю Баскаву, якога западозрылі ў датычнасьці да пабіцьця загінулага актывіста Рамана Бандарэнкі. Баскаў гэтыя абвінавачаньні адпрэчвае.

Што вядома пра сьмерць Рамана Бандарэнкі

Раман Бандарэнка
Раман Бандарэнка
  • Невядомыя ў масках пачалі зразаць бел-чырвона-белыя стужкі ў двары на вуліцы Чарвякова ўвечары 11 лістапада.
  • Пасьля вэрбальнага канфлікту зь мясцовымі жыхарамі невядомыя пачалі нападаць і біць жыхароў. Каля 22:16 некалькі чалавек забралі і зьвезьлі на бусах, падобных да тых, якімі карыстаюцца сілавікі.
  • Паводле непацьверджанай інфармацыі, каля 1,5 гадзіны Бандарэнка знаходзіўся ў Цэнтральным РУУС Менску.
  • У 0:05 Раман Бандарэнка паступіў у лякарню хуткай мэдычнай дапамогі зь вялікім ацёкам мозгу, закрытай чэрапна-мазгавой траўмай, субдуральнымі гематомамі, ударамі, абдзірынамі.
  • Паводле лекараў, ён быў у затарможаным стане, але ў апэрацыйную яго ўжо прывезьлі ў коме. Апэрацыя цягнулася некалькі гадзін.
  • Раман быў у крытычным стане.
  • ​ГУУС Менгарвыканкаму сьцьвярджае, што міліцыя прыбыла на месца толькі пасьля здарэньня. Рамана знайшлі непрытомнага і выклікалі хуткую. Адзін са сьведак здарэньня расказаў Свабодзе, што міліцыя прыяжджала яшчэ тады, калі невядомыя зразалі стужкі, «аднак хутка зьехала, нічога не зрабіўшы».
  • Сьледчы камітэт заявіў, што мужчына быў пʼяны. Аднак мэдыкі гэтую заяву абверглі — у крыві Бандарэнкі алькаголю не было.
  • 19 лістапада затрымалі журналістку Tut.by Кацярыну Барысевіч і лекара Арцёма Сарокіна. Кацярына Барысевіч была аўтаркай артыкула, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін. Пачатак суду над імі прызначаны на 19 лютага.
  • 18 лютага 2021 году, на соты дзень пасьля сьмерці Рамана, Генпракуратура паведаміла яго маці Алене Бандарэнцы, што па факце сьмерці яе сына пачалі крымінальную справу.
  • 17 верасьня 2021 справу прыпынілі«з прычыны неўстанаўленьня асобы, якая падлягае прыцягненьню ў якасьці абвінавачанага».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG