Лінкі ўнівэрсальнага доступу

У Новай Баравой другі дзень няма вады. Ня выключана наўмыснае пашкоджаньне вадаводу


Ужо другі дзень у некаторых кварталах Новай Баравой, а таксама ў школе і дзіцячым садку няма вады. Пітную ваду людзі набіраюць з двух вадавозаў на вуліцы. Яны абураныя, што ні ў «Менскводаканале», ні ў забудоўшчыка «А-100», ні ў Бараўлянскім сельсавеце ня могуць адказаць, калі зьявіцца вада.

Вада ў мікрараёне зьнікла ў нядзелю а 9-й раніцы. Потым каля 15-й у некаторых дамах зьявілася. А 19-й — зноў зьнікла.

У панядзелак у некаторых раёнах вада зьявілася, але напор слабы, кажуць мясцовыя жыхары. А вось кварталы Кедравы, Сасновы, «Форэст» і «Нясумны сад» дагэтуль без вады.

Зранку на Авіяцыйную вуліцу прыехалі дзьве аўтацыстэрны.

«Цугам ідуць людзі з каністрамі, вёдрамі, плястыкавымі бутэлькамі, — кажа кіроўца адной з цыстэрнаў. — Раніцай папрасілі пад’ехаць тэрмінова ў дзіцячы садок. Там набралі вельмі шмат вады, каб хапіла і на заўтрашнюю раніцу. Зараз не магу адлучыцца — просяць тэрмінова да школы пад’ехаць. А тут людзі ідуць і ідуць».

Паводле маладога чалавека, які прыйшоў па ваду, у панядзелак раніцай у мікрараён прыяжджала высокае начальства.

«Раніцай бачылі тут памочніка прэзыдэнта па Менску Аляксандра Барсукова. Была тут і старшыня Бараўлянскага сельсавету. Але зь людзьмі яны не сустрэліся, ціха зьехалі», — сказаў мясцовы жыхар.

Жанчына адной рукой набірае ваду, а другой трымае за руку дзіця.

«Я абураная — з малымі дзецьмі павінна ісьці па ваду. Другія суткі няма вады зусім. Муж пітную прынёс з крамы. Але ж, прабачце, як быць з прыбіральняй?».

«Ваду нам нездарма адключылі. Гэта помста»

Малады чалавек, які адмовіўся назваць сябе, лічыць, што ўлада помсьціць жыхарам Новай Баравой за іх актыўную пазыцыю.

Мэмарыял у Новай Баравой
Мэмарыял у Новай Баравой

«Ваду нездарма нам адключылі. І пра заглушкі, якія нібыта трэба павярнуць, як адказалі камусьці, — гэта лухта поўная. Я перакананы, што сёньня прыедуць „людзі ў чорным“ і да нас — са сьцягамі, стужкамі і мэмарыялам разьбірацца, як было на „плошчы Перамен“ і ў „Каскадзе“. Гэта помста», — сказаў ён.

Паміж Новай Баравой і мікрараёнам Уручча-6 паставілі тры біяпрыбіральні, але з кварталаў, дзе няма вады, да іх ісьці 10 хвілін.

Чаму вады няма — знайшлі, але калі дадуць рады — ня кажуць

А 15-й гадзіне ў чаце «Новай Баравой» кампанія «А-100» паведаміла, што выявілі пашкоджаньне засаўкі ў адным з калодзежаў».

Менскі гарвыканкам заявіў, што разглядае варыянт «наўмыснага пашкоджаньня сыстэмы водазабесьпячэньня».

Калі гэтую няўпраўку ліквідуюць, не паведамляецца.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG