Лінкі ўнівэрсальнага доступу

Невядомыя ў масках забралі доктара-анэстэзіёляга проста з працы


Дзьмітры Каўко, фота з Фэйсбука

Дзьмітры Каўко — анэстэзіёляг, ён працуе ў клініцы «Новы зрок» і РНПЦ дзіцячай хірургіі. Раніцай 12 лістапада людзі ў масках прыйшлі па яго проста ў афтальмалягічную клініку. Калегам не патлумачылі, чаму забіраюць доктара, паведаміла «Наша ніва».

«Яго забралі проста з працы людзі ў цывільным і масках, адвезьлі ў РУУС Савецкага раёну, — сказала „Нашай ніве“ сястра Дзьмітрыя. — Потым прывезьлі дадому, ён узяў заплечнік з рэчамі, і зноў павезьлі ў Савецкае РУУС».

Паводле сястры, цяпер Каўко знаходзіцца на Акрэсьціна. Яго вінавацяць паводле артыкулу 23.34, на днях будзе суд. Што ставяць у віну Дзьмітрыю, ягоная сястра ня ведае.

1 кастрычніка ў прыватным доме доктара правялі ператрус.

«Забралі тады турыстычны інвэнтар. Дзьмітры ходзіць у паходы, ён нават удзельнічаў у беларускай экспэдыцыі ў Антарктыду ў 2017–2018 гадах». Падчас ператрусу канфіскавалі бел-чырвона-белы сьцяг, які там пабываў, — расказвае сястра Каўко. — Забралі турыстычную сякеру, пілу, дэкаратыўную шаблю. Таксама тэхніку: кампутары, тэлефоны.

І пасьля ператрусу — цішыня.

Што там за крымінальная справа, мы так і не зразумелі. Перад ператрусам нам паказвалі пастанову пра крымінальную справу, але вельмі хутка. Што гэта за справа, я не змагла прачытаць.

Калі Дзьмітры вярнуўся з працы, яго ніхто нікуды не выклікаў. У якім ён статусе, таксама было незразумела. Дзьмітры ў выніку сам неяк знайшоў нумар сьледчага, званіў, каб высьветліць, што гэта было, але так і ня мог дазваніцца.

Спрабаваў вярнуць канфіскаваныя рэчы — таксама безвынікова. Адказалі, што з РУУС усё перададзена ў СК.

Ён напісаў ліст у СК пра рэчы тыдні паўтара таму — адказ яшчэ не прыйшоў».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG