Лінкі ўнівэрсальнага доступу

«Дзякуй АМАПу за мір, парадак і патрыятызм». Ігуменьня Гаўрыіла з Горадні пачаставала сілавікоў тортамі. ФОТА


10 лістапада, у дзень ушанаваньня вэтэранаў органаў унутраных спраў і ўнутраных войскаў, УУС Горадзенскага аблвыканкаму наведала ігуменьня жаночага манастыра ў Горадні Гаўрыіла. Тая самая, якая раней называла пратэстоўцаў дэманамі і сэктантамі.

«Дарагія мае, усе людзі вам удзячныя за тое, што вы мужна, цьвёрда, шчыра, аддана любіце сваю Радзіму. Якія б ні былі ў нас у краіне ўнутраныя супярэчнасьці, а яны ня могуць ня быць, таму што ўсе людзі розныя, — усё гэта пройдзе. Бо нават у Сьвятым Пісаньні дапускаецца разнадумства, але толькі разумнае. Дзякуй вам, што вы ў нас ёсьць і што можна да вас зьвярнуцца», — сказала ігуменьня Гаўрыіла, якую цытуе прэс-служба УУС Горадзенскага аблвыканкаму.

Ад імя сваіх вернікаў і большай часткі праваслаўнай Царквы ігуменьня Гаўрыіла выказала «велізарную ўдзячнасьць супрацоўнікам органаў унутраных спраў за іх нялёгкую працу ў гэты складаны час». Яна параіла сілавікам не баяцца і не адказваць, калі чуюць «нейкія дакоры ў свой адрас, а яшчэ страшней — праклёны», бо «яны не закрануць вас».

«Вы ўсё адно нічога не дакажаце — людзі, якія паддаліся заклікам тэлеграм-каналаў, больш нікога ня чуюць. Такі час настаў: абараняць сваю Радзіму не на словах, а рэальна, на справе», — сказала яна.

На фота, апублікаваным УУС Горадзенскага аблвыканкаму, бачна, што сілавікоў частавалі тортамі з надпісамі «Дзякуй АМАПу за мір, парадак і патрыятызм», «Блаславім нашых міліцыянтаў» і іншымі.

  • Ігуменьня Гаўрыіла вядомая тым, што, выступаючы 17 верасьня ў «Менск-Арэне» на арганізаваным у падтрымку Аляксандра Лукашэнкі жаночым форуме «За Беларусь», рэзка скрытыкавала пратэсты, якія праходзяць у краіне. Сярод іншага, у сваім выступе ігуменьня назвала апанэнтаў Аляксандра Лукашэнкі «сэктантамі», а таксама зганьбіла нацыянальныя сымбалі Беларусі.
  • У Беларускай праваслаўнай царкве адмежаваліся ад заяваў ігуменьні Гаўрыілы, падкрэсьліўшы, што гэта яе «асабісты погляд на тое, што адбываецца».
  • 22 верасьня манахіня Гаўрыіла Глухава папрасіла прабачэньня ва ўсіх, каго абразіў або зачапіў яе выступ на жаночым форуме «За Беларусь» 17 верасьня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG