Праваабарончая супольнасьць лічыць, што артыкул 370 Крымінальнага кодэксу павінен быць дэкрыміналізаваны.
Суд Ленінскага раёну Берасьця 6 лістапада вынес прысуд у крымінальнай справе Ільлі Смольскага, якога абвінавацілі ў зьнявазе дзяржаўнага сьцяга паводле артыкулу 370 Крымінальнага кодэксу Беларусі.
Як паведамляе Праваабарончы цэнтар «Вясна», на ўчорашнім пасяджэньні дзяржаўная абвінаваўца Ціхановіч запрасіла для падсуднага адзін год абмежаваньня волі з накіраваньнем ва ўстановы адкрытага тыпу (так званай хіміі) — гэта максымальнае пакараньне па гэтым артыкуле.
Судзьдзя Грушко прызнаў Ільлю Смольскага вінаватым і прызначыў менавіта такое пакараньне.
Сьледзтва выявіла, што 16 верасьня каля гадзіны ночы нехта падышоў да будынка харэаграфічнай школы ў Берасьці і, падскочыўшы, тузануў дзяржаўны сьцяг, пры гэтым дзяржаньне зламалася і сьцяг упаў на зямлю. Затым чалавек пайшоў далей.
Абвінавачаны Смольскі заявіў, што віну прызнае цалкам. Аднак да гэтага на пытаньні аб прычынах свайго ўчынку казаў, што зрабіў гэта «па дурасьці» і што «не хацеў паказаць блюзьнерскага стаўленьня да сьцяга».
Каго яшчэ судзяць за падобнае
У судзе Ленінскага раёну Берасьця 5 лістапада пачаўся разгляд крымінальнай справы, заведзенай на жыхара Кобрыні, 17-гадовага Арцёма Зелянкова. Юнака абвінавачваюць у тым, што таксама зьняславіў дзяржаўны сьцяг, што падпадае пад дзеяньне артыкулу 370 Крымінальнага кодэксу.
Як выяўлена сьледзтвам, 27 верасьня каля фантана на вуліцы Савецкай у Берасьці хлопец, падобны на Зелянкова, спачатку спрабаваў падпаліць дзяржаўны сьцяг, а калі гэтага не атрымалася, то ён пачаў дзерці яго на кавалкі.
З боку абвінавачаньня прысутнічаў адзіны сьведка, опэрупаўнаважаны аддзелу крымінальнага вышуку Пазьняк Аляксандар Сяргеевіч. Відэа з абвінавачаным ён «знайшоў у інтэрнэце», на падставе яго і склаў рапарт. Арцём віну прызнаў цалкам.
Адразу дзьве крымінальныя справы за зьнявагу дзяржаўных сьцягоў заведзеныя ў Гомлі.
Падчас акцыі пратэсту 16 жніўня невядомыя на плошчы Леніна спусьцілі з мачты дзяржаўны сьцяг Рэспублікі Беларусь, абматалі вакол шаста, а празь некаторы час скруцілі яго і паклалі каля агароджы Гомельскага палацава-паркавага ансамбля. На ягонае месца паднялі бел-чырвона-белы сьцяг. Цяпер Сьледчы камітэт вывучае відэазапісы, канфіскаваныя з камэр вулічнага відэаназіраньня, і дапытвае сьведак, каб высьвятліць людзей, якія гэта зьдзейсьнілі.
У іншым выпадку ўжо знайшлі вінаватага. Падчас акцыі пратэсту ў Гомлі жыхар абласнога цэнтру Георгі Васіленка спусьціў з мачты дзяржаўны сьцяг і ўзьняў бел-чырвона-белы сьцяг, а сарваны сьцяг выкінуў ў сьметніцу. Слуханьні ў гэтай справе пачнуцца 17 лістапада ў 10:00 у судзе Цэнтральнага раёну Гомля.
Праваабарончая супольнасьць Беларусі заявіла, што артыкул 370 Крымінальнага кодэксу павінен быць дэкрыміналізаваны, за такія ўчынкі ня можа быць крымінальнага пакараньня.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў