Ад імя палітвязьня Марфы Рабковай прыйшоў ліст, які пісала не яна. Дзяўчына мае іншы почырк, што пацьвердзілі яе сваякі, перадае валянтэрская служба «Вясны». Блізкія Рабковай западозрылі правакацыю спэцслужбаў.
Маці аднаго з палітвязьняў атрымала ліст нібыта ад Марфы, дзе тая падрабязна піша пра «фашыстаў з КДБ і ГУБАЗіК» і пра «абвінавачаньні ў адміністраваньні чатаў». Аднак почырк у лісьце не супадае з сапраўдным почыркам Рабковай, што пацьвердзілі сваякі. Сама Рабкова перадала з ізалятара, што не пісала ніякіх лістоў гэтай жанчыне.
«Пытаньне аб мэтах, якія такім чынам перасьледуюць „невядомыя“, застаецца адкрытым, але, мяркуючы па ўсім, разьлік быў у тым, каб справакаваць суразмоўцу на „радыкальныя прамовы“, якія потым можна выкарыстоўваць у матэрыялах справы», — піша тэлеграм-канал валянтэраў ПЦ «Вясна».
Ліст прыйшоў на фоне поўнай блякады карэспандэнцыі ад бацькоў Марфы. Да ўсяго іншага, вядома, што Рабкова знаходзіцца ў маленькай камэры, але пры гэтым у яе даўно адсутнічаюць прагулкі, а цяпер баліць сьпіна ад тонкага матраца і мэталічных нараў.
Валянтэрку, якая дакумэнтавала выпадкі катаваньняў мірных пратэстоўцаў сілавікамі, затрымалі 17 верасьня. Марфе Рабковай выставілі абвінавачаньне паводле ч. 3 арт. 293 Крымінальнага кодэксу (навучаньне ці іншая падрыхтоўка асобаў для ўдзелу ў масавых беспарадках, альбо фінансаваньне такой дзейнасьці), яна знаходзіцца пад арыштам у СІЗА №1 Менску.