Лінкі ўнівэрсальнага доступу

Нядзельны марш у Курапаты. Што адбываецца ў Беларусі на 85-ы дзень пратэстаў

1 лістапада ў Менску а 14-й гадзіне распачаўся марш «Дзяды супраць тэрору» ў Курапаты. Першае шэсьце на Дзяды адбылося 32 гады таму. Тады ўпершыню на вулічнай акцыі ўзьнялі бел-чырвона-белы сьцяг.


Нягледзячы на жорсткія разгоны, некалькім тысячам удалося дабрацца да мэмарыялу ў Курапатах
20:43 1.11.2020

Онлайн-трансьляцыя скончаная.

Падсумаваньне зь Менскага маршу можна пачытаць і паглядзець тут.

За ўсімі апошнімі навінамі сачыце ў Тэлеграме Свабоды!

20:38 1.11.2020

Шэсьце 1 лістапада ў Менску ўпершыню не было 100-тысячным. Як думаеце, чаму?

Паўдзельнічайце ў апытанцы ў нашым тэлеграм-канале!

20:37 1.11.2020

У Слуцку затрымалі двух мэдыкаў

У Слуцку затрымалі загадчыка траўматалягічнага аддзяленьня Слуцкай ЦРБ Юрыя Акаёмава (на фота) і лекара-хірурга Юрыя Міхайлоўскага. Яны сталі ў белых халатах насупраць райвыканкаму, разгарнулі бела-чырвона-белы сьцяг з «Пагоняй» і прастаялі хвілін 20, да прыезду міліцыі. На мэдыкаў склалі пратаколы паводле арт. 23.34, заўтра іх будуць судзіць, паведамляюць «Белые Халаты».

20:03 1.11.2020

Больш за 150 чалавек затрымалі сёньня

Праваабаронцы «Вясны» сабралі прозьвішчы ўжо 168 затрыманых 1 лістапада ў Беларусі, сьпіс дапаўняецца.

Сярод затрыманых у Менску — фатограф Аляксандр Зянковіч, аўтар «віруснага» фота з «Маршу гонару» 11 кастрычніка ⬆️, дзе сілавік наводзіць буйнакалібэрную стрэльбу на жанчыну з парасонам; былы юрыст Адміністрацыі прэзідэнта Аляксандр Пласкавіцкі, а таксама палітвязень Мікіта Ліхавід.

20:01 1.11.2020

Апэратара «Белсату» білі камэрай па галаве

З Кастрычніцкага РУУС выпусьцілі непаўналетняга хлопца, які расказаў, што апэратара «Белсату» Дзьмітрыя Солтана білі ў аўтазаку і пазьней, ударылі камэрай па галаве. Камэру разьбілі. «Усяго за сёньня затрымалі 4 журналістаў, дваіх жорстка пабілі», — распавёў прадстаўнік Беларускай асацыяцыі журналістаў Барыс Гарэцкі.

19:17 1.11.2020

Сілавікі прызналі, што выкарыстоўвалі зброю

Сілавікі сёньня выкарыстоўвалі несьмяротную зброю для папераджальных стрэлаў у паветра, каб спыніць выхад на МКАД і на праспэкт Незалежнасьці ў Менску, паведамілі агенцтву «Інтэрфакс-Захад» у прэс-службе ГУУС Менгарвыканкаму.

19:06 1.11.2020

Праваабаронцы паведамляюць ужо больш як пра сотню затрыманых

У сьпісе затрыманых 1 лістапада на акцыях у Менску і ў іншых гарадах Беларусі, які складаюць праваабаронцы «Вясны», на цяперашні момант ужо 107 прозьвішчаў. Сярод затрыманых у Менску – вядомы беларускі скульптар Гэнік Лойка.

18:31 1.11.2020

Сёньняшні марш у Курапаты. ФОТА

ГЛЯДЗЕЦЬ УСЕ ФОТА ТУТ

18:24 1.11.2020

Менск. Людзі ўцякалі ад гранат з воклічамі «Жыве Беларусь!»

Відэа, як людзі бягуць ад сьвятлашумавых гранат на вуліцы Мірашнічэнкі. І ўцякаючы, адна дзяўчына ў канцы крычыць «Жыве Беларусь!»

17:53 1.11.2020

Людзі пачынаюць разыходзіцца з Курапатаў

Людзі пачынаюць разыходзіцца з Курапатаў, ідуць назад у горад.

Адзін з удзельнікаў маршу падзяліўся з Радыё Свабода тым, як удалося трапіць у Курапаты: «Пасьля першага разгону ў Курапатах, шмат людзей выбеглі на вуліцу Мірашнічэнкі. Калі разгон суцішыўся, людзі зноў сабраліся разам. Сфармавалася калёна, і ўздоўж кальцавой, не заходзячы ў падземны пераход, мы дайшлі ў самі Курапаты. Там разам сьпявалі песьні, была Ніна Багінская. Ніхто не разганяў. Разышліся ня так даўно».

17:43 1.11.2020

Праваабаронцы «Вясны» паведамляюць ужо пра 77 затрыманых

У сьпісе затрыманых 1 лістапада на акцыі ў Менску, а таксама ў іншых гарадах Беларусі на рэгіянальных акцыях, які складаюць праваабаронцы «Вясны», на цяперашні момант ужо 77 прозьвішчаў. Сьпіс працягвае дапаўняцца.

17:39 1.11.2020

Менск: на Мірашнічэнкі зноў «хапун»

17:23 1.11.2020

Менск: пратэстоўцы працягваюць падыходзіць да Курапатаў

Частка людзей, якія ўжо схадзілі ў Курапаты, дайшла да запраўкі, якая знаходзіцца за рэстаранам «Поедем поедим». Яны плянуюць вяртацца ў горад, паведамляе Kyky.org.

Пры гэтым людзі зь іншых калёнаў працягваюць падыходзіць да Курапатаў.

Пратэстоўцы, якія дайшлі да Курапатаў, падымаюцца да асноўнага мэмарыялу праз жывы калідор, які людзі ўтварылі абапал сьцежкі, стаўшы плячом у плячо і ўзьняўшы нацыянальныя сьцягі. Наверсе, ля цэнтральнага мэмарыялу, сьпяваюць песьні, гучалі і «Муры». Відаць, што многія ў Курапатах упершыню.

Тым часам новая калёна сілавікоў пад'язжджае да Курапатаў.

17:15 1.11.2020

17:00 1.11.2020

Нягледзячы на ўсе перашкоды сілавікоў, людзі прарваліся ў Курапаты

Людзі, якія дайшлі да Курапатаў, нясуць кветкі і запальваюць зьнічкі на месцы расстрэлаў часоў сталінскіх рэпрэсіяў. Невялікім струменем людзі яшчэ ідуць па полі ў Курапаты.

Паводле «Белсату», у Курапатах змаглі сабрацца пару тысяч чалавек. Шмат сілавікоў стаіць на запраўцы «Беларусьнафта». Каля «Экспабелу» група каля 100 чалавек. Некаторыя зноў ідуць у Курапаты полем.

16:48 1.11.2020

Менск: на Мірашнічэнкі працягваюцца затрыманьні

Сілавікі працягваюць затрымліваць пратэстоўцаў, якія разьбегліся па дварах у раёне вуліцы Мірашнічэнка.

16:41 1.11.2020

Каля Курапатаў сілавікі працягваюць разганяць людзей

Частка калёны прарвалася да поля і ідзе па ім да ўрочышча Курапаты.

Раварыста б'юць людзі ў цывільным адзеньні, але з вайсковым рыштункам без апазнавальных знакаў
Раварыста б'юць людзі ў цывільным адзеньні, але з вайсковым рыштункам без апазнавальных знакаў

Тым часам ва Ўруччы перакрылі зьезд з праспэкту Незалежнасьці на МКАД у бок Курапатаў, паведамляюць чытачы Tut.by.

16:29 1.11.2020

Па МКАД да Курапатаў пад’ехала калёна вайскоўцаў, на Мірашнічэнкі зноў зьбіраюцца людзі

Па МКАД да Курапатаў пад’яжджае вялікая калёна спэцназу 3214, а таксама вадамёт. Сілавікі пачалі вылазіць з грузавікоў.

Тым часам з вуліцы Цікоцкага ідзе невялікая калёна да вуліцы Мірашнічэнка. Яе сустракаюць мікрааўтобусы зь сілавікамі на аўтобусным прыпынку «Зялёны луг – 6».

На пачатку вуліцы Мірашнічэнка пасьля разгону зноў пачалі зьбірацца людзі. Яны скандуюць «Трыбунал», «Жыве Беларусь».

16:26 1.11.2020

Менск: вайсковая тэхніка едзе з Уручча ў бок цэнтру

16:24 1.11.2020

Пратэстоўцаў ля Курапатаў разагналі

Разагналі натоўп на полі каля Курапатаў. Бусы сілавікоў езьдзілі проста па полі, былі чуваць стрэлы і выбухі. Людзей даганялі літаральна на хуткасьці. Працаваў ГУБАЗіК.

Цяпер пратэстоўцаў на полі ля Курапатаў больш няма. Затрымалі шмат людзей.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG