Лінкі ўнівэрсальнага доступу

Страйкі на заводах. Пратэст студэнтаў і пэнсіянэраў. Што адбываецца ў першы дзень пасьля ўльтыматуму Ціханоўскай

26 кастрычніка Сьвятлана Ціханоўская заклікала да ўсеагульнага страйку з патрабаваньнем сыходу Лукашэнкі і новых прэзыдэнцкіх выбараў.


Аб'яднаны марш пэнсіянэраў і студэнтаў у Менску

Коратка

26 кастрычніка Сьвятлана Ціханоўская заклікала да ўсеагульнай забастоўкі з патрабаваньнем сыходу Лукашэнкі і новых прэзыдэнцкіх выбараў. Мы сочым за тым, што адбываецца ў краіне.

21:50 26.10.2020

Amnesty International заклікае ўлады Беларусі пакласьці канец міліцэйскаму гвалту

«Мы з шокам і трывогай бачым, як гэты рэжым, які на працягу некалькіх тыдняў практыкаваў гвалт у дачыненьні да дэманстрантаў на вуліцах і ў месцах утрыманьня пад вартай, сёньня накіраваў АМАП у масках для зьбіцьця і арышту працоўных, якія страйкуюць, наўпрост на іх працоўных месцах, — сказана ў заяве Amnesty International. — Улады праяўляюць адкрытую пагарду да самых асноўных правоў чалавека, і права на страйк стала яшчэ адным, якое было бязьлітасна патаптанае пры дапамозе міліцэйскіх ботаў і дубінак».

21:48 26.10.2020

Акцыя пратэсту ў Менску працягнулася на плошчы Якуба Коласа, адбыліся новыя затрыманьні

У цэнтры Менску ўвечары працягвалася акцыя ў падтрымку агульнанацыянальнай забастоўкі. Яе ўдзельнікі дайшлі да плошчы Якуба Коласа, дзе сталі ў ланцуг. Каля 20.00, калі на плошчы сабралася каля 100 пратэстуючых, у асноўным каля філярмоніі, туды прыехалі сілавікі.

Людзі пабеглі ад іх за філярмонію ўверх па бульвары Мулявіна. За імі па сустрэчнай паласе паехалі тры мікрааўтобусы ў суправаджэньні аўтамабіля ДАІ са уключаным пробліскавым маячком. З боку вуліцы Якуба Коласа прыехаў аўтазак, зь якога выгрузіліся сілавікі ў абмундзіраваньні.

21:47 26.10.2020

«Агульнанацыянальны страйк толькі распачаўся і будзе ўзмацняцца», — Ціханоўская пра першыя вынікі

Лідэрка Сьвятлана Ціханоўская падсумоўвае першыя вынікі страйкаў, якія распачаліся ў Беларусі пасьля таго, як Аляксандар Лукашэнка праігнараваў ультыматум, выстаўлены яму Ціханоўскай ад імя апазыцыйных сілаў.

19:48 26.10.2020

Хто бастуе 26 кастрычніка

26 кастрычніка Сьвятлана Ціханоўская заклікала да ўсеагульнага страйку з патрабаваньнем сыходу Лукашэнкі і новых прэзыдэнцкіх выбараў. Вось хто далучыўся да страйку ў гэты дзень.

19:08 26.10.2020

Сілавікі не далі пратэстоўцам сабрацца ў цэнтры Менску

Каля 18.00 на плошчы Незалежнасьці пачалі зьбірацца людзі. Супрацоўнікі АМАП заклікалі іх сысьці «ў мэтах вашай бясьпекі». Людзей — некалькі дзясяткаў чалавек — паступова адціснулі да гатэля «Менск». На самой плошчы зьявіўся ланцуг АМАПу ў касках са шчытамі.

Урэшце плошча Незалежнасьці была ачэпленая ланцугамі АМАП, на вуліцы Савецкай, як падчас ранейшых акцый, стаяла мноства спэцтэхнікі. Але людзі групамі пайшлі ад плошчы ў цэнтар, у бок Кастрычніцкай плошчы. Аўтамабілісты падтрымлівалі іх гудкамі.

Да калёны пратэстоўцаў каля «Макдональдса» пад'ехалі бусы, частка ўдзельнікаў шэсьця разьбеглася.

Пачаўся жорсткі хапун каля Дома прафсаюзаў. Некаторых пры затрыманьні зьбівалі. Людзі хаваліся ў дварах. Аднаго чалавека зьбілі так моцна, што ён застаўся ляжаць на зямлі. Яго паднялі амапаўцы і зацягнулі па зямлі ў бус. Магчыма, затрыманыя дзясяткі чалавек.

19:01 26.10.2020

Праваабаронцы сабралі прозьвішчы 210 затрыманых у першы дзень страйку

Працаўнікі шэрагу дзяржаўных і камэрцыйных прадпрыемстваў і навучальных установаў ад раніцы распачалі пратэсты, мітынгі, на прадпрыемствах і ў ВНУ заяўляюць пра страйкі.

Як паведамляе Праваабарончы цэнтар «Вясна», па стане на 18.30 ужо вядома пра 210 затрыманых у Менску, Барысаве, Горадні, Магілёве, Наваполацку.

Сярод затрыманых генэральны дырэктар Onliner Ільля Жукавец і распрацоўшчык Аляксандар Махораў, паведаміў рэдактар сайта Мікалай Казловіч. Затрыманы таксама паэт Эдуард Акулін, паведамляе «Вясна».

18:19 26.10.2020

Прадстаўнік КДБ: экстрэмісцкія дзеяньні пратэстоўцаў можна кваліфікаваць як акт тэрарызму

«Апошнімі днямі ў Беларусі сталі частымі выпадкі экстрэмісцкіх праяваў з боку пратэстна настроеных асобаў», заявіў начальнік аддзелу сьледчага ўпраўленьня КДБ Канстанцін Бычак.

Сілавікі атакуюць дэманстрантаў сьвятлашумавымі гранатамі і гумовымі кулямі ў канцы маршу 25 красавіка на вуліцы Арлоўскай
Сілавікі атакуюць дэманстрантаў сьвятлашумавымі гранатамі і гумовымі кулямі ў канцы маршу 25 красавіка на вуліцы Арлоўскай

Паводле яго, гэтыя дзеяньні «сплянаваныя і рэалізаваныя арганізаванымі злачыннымі групамі» і спалучаныя з «учыненьнем выбухаў, падпалаў, іншых дзеяньняў, якія ствараюць небясьпеку гібелі людзей, нанясеньня ім цялесных пашкоджаньняў», таму іх можна кваліфікаваць «як акт тэрарызму».

18:08 26.10.2020

Пры разгоне акцыі ля ПВТ адзін з амапаўцаў зламаў нагу

Пры разгоне пратэстоўцаў ля Парку высокіх тэхналёгій адзін з супрацоўнікаў АМАП атрымаў траўму, паведамілі Tut.by чытачы.

Інфармацыю пацьвердзілі ў ГУУС Менгарвыканкаму: «Супрацоўнік АМАП атрымаў траўму, ён шпіталізаваны. Паводле папярэдняй інфармацыі, у яго пералом галёнкі са ссоўваньнем»

17:47 26.10.2020

Горадня. ЦЭЦ-2

Супрацоўнікі ЦЭЦ-2 выйшлі на акцыю супраць гвалту.

17:37 26.10.2020

Менск. Супрацоўнікі БелОМА выйшлі на акцыю супраць гвалту

17:35 26.10.2020

Бараўляны. Ланцуг салідарнасьці ля абласной бальніцы

17:33 26.10.2020

«Больш не дазволім ператварыць школу ў абслугу рэжыму», — менскія настаўнікі

Настаўнікі менскай гімназіі № 50 запісалі зварот да калегаў і падтрымалі пратэстоўцаў.

«Мы, настаўнікі, у гэты пераломны момант у жыцьці нашай краіны ня можам заставацца ўбаку і маўчаць. Мы хочам дакладна і гучна выказаць ня толькі сваё меркаваньне, а і свае патрабаваньні», — адзначаюць яны ў супольнай заяве.

17:05 26.10.2020

Як сёньня пратэставалі менскія студэнты. ВІДЭА

16:43 26.10.2020

«Што, с***, працаваць ня хочаш?». «Азотаўцы» расказалі, што іх зьбівалі

Супрацоўнікі «Гродна Азот», якія падтрымалі забастоўку, расказалі, што ранкам іх затрымлівалі сілавікі ў чорнай і аліўкавай форме, у балаклавах. Аднаго з хлопцаў ударылі нагой у сьпіну, дзяўчыне пры затрыманьні пашкодзілі нагу, яна кульгала, калі выйшла з РАУС.

У аўтобусе мужчын білі дручкамі і рукамі па твары. Адзін зь сілавікоў пры гэтым сказаў: «Што, с***, працаваць ня хочаце?». Большасьць выйшла з РАУС без адміністрацыйных пратаколаў.

У цэхах аміяк-3 і кармамід-4 працягвае працаваць начная зьмена ўжо больш за 20 гадзін, а таксама кіраўніцтва. Работнікі, якія прыйшлі ранкам, адмаўляюцца пераймаць зьмену і чакаюць распараджэння пачаць спыненьне вытворчасьці. Начальства прапануе ім узяцца за працу.

16:37 26.10.2020

Менск. Марш пэнсіянэраў і студэнтаў перайшоў у мітынг на плошчы Якуба Коласа

Больш фота — ТУТ.

16:18 26.10.2020

Менск. МАЗ

На МАЗе каля 100 працаўнікоў удзельнічаюць у «італьянскай» забастоўцы, паведамляюць са страйкаму прадпрыемства.

«Раніцай у сходзе з намесьнікам гендырэктара бралі удзел каля 100 працаўнікоў, паслухалі і разышліся па працоўных месцах, але працуюць не па-сапраўднаму, а „па- італьянску“. А цяпер у курылках абмяркоўваюць, калі пачнуць страйк і як: на асобных месцах ці па цэхах», — паведаміла крыніца на МАЗе.

16:15 26.10.2020

Міністар адукацыі: «Нягледзячы на шматлікія заклікі да забастовак, сёньня навучальны працэс ва ўсіх установах адукацыі ідзе ў штатным рэжыме»

Карпенка кажа, што толькі ў «некаторых» ВНУ назіраюцца «спробы зрыву навучальнага працэсу асобнымі студэнтамі», «абрáзы выкладчыкаў і кіраўнікоў ВНУ»

15:59 26.10.2020

Менск. Марш дайшоў да плошчы Якуба Коласа

15:27 26.10.2020

Маршы пэнсіянэраў праходзяць у Берасьці і Горадні

15:22 26.10.2020

Менск.

Галава калёны пэнсіянэраў і студэнтаў ужо на плошчы Перамогі.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG