Менск: пратэстоўцы дайшлі да плошчы Бангалор
Галава калёны дайшла да плошчы Бангалор. На доме № 78 па вуліцы Багдановіча, які прымыкае да плошчы, вісіць вялізны бел-чырвоны-белы сьцяг з надпісам «Шчучыншчына». Гэта вельмі весяліць людзей у калёне.
Менск: шмат сілавікоў на Якуба Коласа і Акадэміі навук
А вось так выглядае калёна пратэстоўцаў на вуліцы Максіма Багдановіча.
Улады прызналі ўжываньне сьлезацечнага газу ў Лідзе
«Пры спыненьні несанкцыянаванай акцыі пратэсту ў Лідзе быў ужыты сьлезацечны газ», пацьвердзілі агенцтву «Інтэрфакс-Захад» у прэс-службе УУС Горадзенскага аблвыканкаму. Таксама паведамілі, што па адміністрацыйных справах затрымалі «некалькі дзясяткаў чалавек».
Менск: пратэстоўцы дайшлі да «Рыгі»
Галава калёны ўжо дайшла да ўнівэрсаму «Рыга». Пакуль не зразумела, куды людзі будуць рушыць далей.
Тым часам сілавікі перакрылі вуліцу Сурганава каля скрыжаваньня з вуліцай Якуба Коласа і расьцягваюць там калючы дрот.
Як паведамляе БелаПАН, вызначыць колькасьць удзельнікаў сёньняшняга маршу складана, бо калёна расьцягнулася на кілямэтры, але, паводле ацэнак журналістаў, якія ўвесь час працуюць на нядзельных акцыях, можна казаць пра як мінімум 100 тысяч чалавек.
Гомель: сілавікі не даюць людзям сабрацца
У Гомлі сілавікі не даюць людзям зьбірацца нават невялікімі групамі. На пляцоўцы каля цырку затрымалі 6 чалавек, у тым ліку жанчыну 1946 году нараджэньня.
У Наваполацку спрабавалі затрымаць пэнсіянэраў
Менск: пратэстоўцы паспрабавалі абысьці АМАП
Вуліца Якуба Коласа перагароджаная шчыльным шэрагам АМАПу, калючым дротам, тут стаіць вадамёт. Людзі спрабуюць абысьці АМАП і павярнуць з вуліцы Сурганава налева, у бок вуліцы Калініна.
З боку плошчы Якуба Коласа па аднайменнай вуліцы ў кірунку вуліцы Сурганава паехалі дзясяткі транспартных сродкаў сілавікоў: аўтобусы з АМАПам, міні-аўтобусы, а таксама машыны хуткай дапамогі.
Віцебск: сілавікі заблякавалі машыну, якая сыгналіла пратэстоўцам
Менск: калёна разьвярнулася і пайшла назад па Сурганава
Пратэстоўцы разьвярнуліся і пайшлі назад па вуліцы Сурганава. Галава калёны стала яе хвастом.
АМАП перакрыў таксама вуліцу Куйбышава, якая прымыкае да Сурганава, а таксама вуліцу Багдана Хмяльніцкага.
Колькасьць дэманстрантаў у Менску ацэньваюць ад «дзясяткаў тысяч» да «100 тысяч»
- Інтэрфакс, спасылаючыся на апазыцыю, называе лічбу ў 100 тысяч: «Колькасьць удзельнікаў несанкцыянаванага пратэсту ў Менску ў апошні дзень «народнага ўльтыматуму» перавысіла 100 тыс. чалавек».
- ТАСС: «Дзясяткі тысяч дэманстрантаў ідуць у Менску па вуліцы Сурганава».
- БелаПАН: «Вызначыць колькасьць удзельнікаў маршу складана, бо калёна расьцягнулася на кілямэтры, але, паводле ацэнак журналістаў, якія працуюць увесь час на нядзельных акцыях, можна казаць пра як мінімум 100 тысяч».
- РИА Новости: «У Менску апазыцыя арганізавала шматтысячнае шэсьце».
- Карэспандэнты Свабоды ацэньваюць колькасьць удзельнікаў маршу ў «100 тысяч і больш».
Менск: людзі разыходзяцца ў розныя бакі вялікімі групамі
Пратэстоўцы з калёны на вуліцы Сурганава разыходзяцца вялікімі групамі ў розныя бакі.
Большая частка людзей рушыла па вуліцы Арлоўскай, яшчэ некалькі тысяч пайшлі па Багдановіча ў бок Зялёнага Лугу.
Акцыя ў Наваградку
У Віцебску затрымалі журналіста «Белсату»
У Віцебску затрымалі журналіста «Белсату» Зьмітра Казакевіча.
Менск: адкрылі ўсе станцыі мэтро
У 17:08 усе станцыі метро адкрылі (сёньня закрывалі 12 станцый). Часова закрыты адзін вэстыбюль станцыі «Плошча Леніна» (уваход з боку плошчы Незалежнасьці), цягнікі на гэтай станцыі спыняюцца.
Акцыя ў Берасьці
«Ланцуг салідарнасьці» ў Менску
На маршы ў Горадні затрымалі каля сотні чалавек, сярод іх непаўналетнія
Стала вядома, што на маршы ў Горадні затрымалі прынамсі 4 непаўналетніх ва ўзросьце ад 14 да 17 гадоў. Пра гэта расказала адна зь дзяўчат, якую выпусьцілі, калі па яе прыехалі бацькі. Яна паведаміла, што затрымлівалі жорстка. Яе схапілі за шыю і паклалі тварам у асфальт. Разам зь ёй затрымалі, а потым адпусьцілі яе хлопца. Па ейных словах, затрымалі больш за 100 чалавек.
Яшчэ адзін затрыманы пасьпеў пазваніць сваёй жонцы і расказаў, што больш як 100 затрыманых сядзяць у тыры Ленінскага РАУС Горадні. У іх забіраюць тэлефоны.
Як затрымлівалі ў Горадні:
Менск: шэсьце працягваецца, калёна ідзе па Арлоўскай
Калёна ідзе па вуліцы Арлоўскай. Калі калёна праходзіла паўз будынак Цэнтральнага РУУС, пачалі скандаваць: «Трыбунал», «Не забудзем, не даруем». Запалілі ліхтарыкі мабільных тэлефонаў.
Кіроўцы падтрымліваюць пратэстоўцаў сыгналамі.
Менск: АМАП і вадамёты перагарадзілі пратэстоўцам шлях. Чуваць стрэлы
За мостам на Арлоўскай стаіць сыстэма «Рубеж», 2 вадамёты, ланцуг АМАПу. Яны перагарадзілі калёне шлях да праспэкту Пераможцаў.
Удзельнікі Маршу падышлі да самага ланцуга АМАПу, адлегласьць паміж імі — 5 мэтраў. Крычаць: «Сыходзь!».
Раздаліся некалькі стрэлаў. АМАП спрабуе адагнаць пратэстоўцаў ад ланцуга. Людзі крычаць: «Фашысты!».
Менск: пратэстоўцы адыходзяць ад ланцуга АМАП
Калёна адыходзіць ад ланцуга АМАП. У калёне ёсьць паведамленьні, што па Арлоўскай у бок пратэстоўцаў рухаецца спэцтэхніка.