«Народны ўльтыматум» апублікаваны ў афіцыйным тэлеграм-канале Сьвятланы Ціханоўскай з тэрмінам выкананьня да 25 кастрычніка.
Ціханоўская дае Лукашэнку 13 дзён, каб «выканаць тры абавязковыя патрабаваньні»:
- Лукашэнка павінен абвясьціць аб сыходзе.
- Гвалт на вуліцах павінен спыніцца цалкам.
- Усе палітвязьні павінны быць вызвалены.
Калі да 25 кастрычніка гэтыя патрабаваньні ня будуць выкананыя, «уся краіна выйдзе на вуліцы», абяцае Ціханоўская, і «26 кастрычніка пачнецца нацыянальны страйк усіх прадпрыемстваў, блякаваньне ўсіх дарог, абвал продажаў у дзяржаўных крамах».
Паводле Ціханоўскай, тое, што цяпер сілавікі б’юць ня толькі мужчын, а і жанчын, і дзяцей, і старых, — «гэта дзяржаўны тэрор, і кожны, хто яшчэ не прыняў рашэньне перайсьці на бок народу — саўдзельнік тэрору». Яна дадала, што «размовы за кратамі — гэта не дыялёг, біць свой народ пасьля заяваў аб гатоўнасьці да перамоваў — не дыялёг».
«У вас ёсьць 13 дзён, каб выканаць тры ўмовы. У нас ёсьць 13 дзён, каб падрыхтавацца, і ўвесь гэты час беларусы будуць працягваць свой мірны і настойлівы пратэст», — гаворыцца ў канале Ціханоўскай.
