Лінкі ўнівэрсальнага доступу

Калі ў Беларусі зьявіцца француская вакцына ад грыпу


Вакцынацыя ад грыпу. Ілюстрацыйнае фота

Францускі «Ваксігрып» павінен зьявіцца ў Беларусі ў другой палове лістапада. А вось галяндзкага «Інфлюваку» сёлета больш ня будзе.

У Беларусі цяпер няма заходніх вакцынаў супраць грыпу ні ў камэрцыйных мэдычных цэнтрах, ні ў паліклініках. Можна прышчапіцца толькі расейскай вакцынай «Гриппол плюс».

Але ў прадстаўніцтве францускай кампаніі Sanofi Pasteur Свабоду запэўнілі: толькі што прынята рашэньне паставіць у Беларусь дадатковую партыю францускага «Ваксігрыпу».

Заходніх вакцынаў няма, толькі расейскія — за 6 рублёў 20 капеек

Сёлета ў Беларусі можна было прышчапіцца трыма відамі вакцынаў: «Ваксігрып» францускай кампаніі Sanofi Pasteur, «Інфлювак» нідэрляндзкай кампаніі Abbott і «Гриппол плюс» расейскай кампаніі «Петровакс».

Для вакцынацыі за кошт нацыянальнага і мясцовых бюджэтаў «Белфармацыя» закупіла вакцыну «Гриппол плюс». Яна трохвалентная — абараняе ад двух відаў вірусаў грыпу А (A/H1N1+A/H3N2) і аднаго — вірусу В (Victoria).

Пэнсіянэраў, дзяцей, цяжарных жанчын, людзей з хранічнымі хваробамі прышчапляюць бясплатна. Для астатніх расейская прышчэпка каштуе ў паліклініцы 6 рублёў 20 капеек.

У 2020 годзе міністэрства здароўя плянуе прышчапіць ня менш за 40% насельніцтва і ня менш як 75% — з групаў рызыкі.

Імпартныя вакцыны былі ў паліклініках яшчэ на пачатку кастрычніка, каштавалі 18 рублёў, але вельмі хутка скончыліся.

«Галяндзкай вакцыны больш ня будзе»

У аддзеле лекавага забесьпячэньня РУП «Белфармацыя» паведамілі, што больш ніякіх дадатковых паставак процігрыпозных імпартных вакцын у Беларусь сёлета ня будзе.

«Ні нідэрляндзкага „Інфлюваку“, ні расейскага „Грыполу“. А іншых вакцынаў „Белфармацыя“ не закупляла. Паўсюль у паліклініках ёсьць расейскі „Грыпол“, яго закупілі дастаткова. Мы рабілі дадатковы запыт на пастаўку нідэрляндзкай вакцыны „Інфлювак“ на завод-вытворцу, але нам адмовілі. Сёлета павышаны ажыятаж», — сказала супрацоўніца «Белфармацыі».

У мэдычных цэнтрах кажуць, што да іх запісацца на вакцынацыю ўжо нельга

У камэрцыйным мэдычным цэнтры «ЛОДЭ» Свабодзе паведамілі, што сёлета вакцынацыя наагул больш праводзіцца ня будзе.

«Скончылася вакцынацыя. Запіс на прышчэпкі сфармаваны да канца лістапада. Тым, хто запісаўся яшчэ ў верасьні, прышчэпкі робяць рэшткамі вакцыны, працэдурны кабінэт працуе. Але запісацца нельга», — адказала супрацоўніца кол-цэнтру.

У цэнтры «Нардзін» таксама паведамілі, што вакцынащ няма і больш паставак у цэнтар ня будзе.

«Была француская вакцына „Ваксігрып“, яна скончылася. У паліклініках ёсьць расейскія вакцыны, тэлефануйце туды. У пастаўника, у якога мы закупляем, вакцыны няма. І ня будзе, бо межы закрытыя. Тэлефануйце ў міністэрства».

Попыт на вакцыны ад грыпу сёлета падвышаны

Францускую вакцыну «Ваксігрып» закупляла фармацэўтычная кампанія «Мэдвакс».

Прадстаўнік аддзелу продажаў «Мэдваксу» паведаміў, што ўсе заяўкі, якія мэдычныя цэнтры і паліклінікі зрабілі перад сэзонам прышчэпак, выкананыя. Цяпер рыхтуюць дадатковую заяўку ў кампанію Sanofi Pasteur.

Фармацэўтычная кампанія Sanofi.
Фармацэўтычная кампанія Sanofi.

«Вельмі дзіўна, што камэрцыйныя мэдычныя цэнтры кажуць, што вакцынацыя скончылася. Проста ніхто не прагназаваў такога павышанага попыту. Гэта такі ўсясьветны ўздым сёлета. Хутчэй за ўсё, яшчэ і COVID-19 паўплываў. Плянуецца дадатковая пастаўка — у апошні тыдзень лістапада. Усё залежыць ад канкрэтнай колькасьці заявак ад тых жа „ЛОДЭ“, „Нардзіну“, паліклінік», — кажа прадстаўнік «Мэдваксу», дыстрыбутара францускай вакцыны ў Беларусі.

Ён патлумачыў, што неабходна набраць пэўную колькасьць заявак, бо кампанія можа адмовіцца пастаўляць зусім малую партыю, ёй гэта нявыгадна.

«Проста вакцына — гэта не пігулка, яна патрабуе вельмі дакладнага захаваньня тэмпэратурнага рэжыму. Усё залежыць ад таго, колькі будзе заявак. Калі менш за 10 тысяч — кампанія адмовіцца пастаўляць».

Француская вакцына будзе ў лістападзе

Свабода зьвязалася і з прадстаўніцтвам у Беларусі АТ Sanofi-Aventis Groupe.

Супрацоўніца кампаніі запэўніла Свабоду, што літаральна сёньня прынята рашэньне дадаткова паставіць францускую чатырохвалентную вакцыну «Ваксігрып тэтра» ў Беларусь — у другой палове лістапада.

«Задача няпростая менавіта ў пастаўцы вакцыны. Бо вельмі важна вытрымаць так званы «холадавы ланцуг» — ад моманту вытворчасьці да дастаўкі. Неабходныя адмысловыя кантэйнэры з тэрмачуйнікамі, гэта крыху ўскладняе задачу, бо звычайна лягістыка, дастаўка плянуюцца загадзя. Але рашэньне прынята — дадатковая партыя вакцыны «Ваксігрып тэтра» будзе дастаўлена ў Беларусь у другой палове лістапада",— запэўніла прадстаўніца Sanofi-Aventis Groupe.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG