На журналіста Белсату Зьмітра Міцкевіча склалі 2 пратаколы паводле артыкулаў адміністрацыйнага кодэксу аб непадпарадкаваньні супрацоўнікам міліцыі і ўдзеле ў недазволеным масавым мерапрыемстве. Яго пакінулі пад вартай да суду.
У менскім мікрараёне Серабранка пратэстоўцы перакрылі рух. Там на праезнай частцы палілі пакрышкі.
У менскім мікрараёне Малінаўка позна ўвечары працягваліся пратэсты і затрыманьні, было чуваць стрэлы.
На ўсіх журналістаў, якіх знаходзіліся ў Кастрычніцкім РУУС Менску, завялі адміністрацыйныя справы, паведаміў журналістам супрацоўнік прэс-службы ГУУС Менгарвыканкаму Раман Лашкевіч.
Сярод затрыманых сёньня — брат знакамітай спартоўкі, узнагароджанай званьнем героя Беларусі, Дар'і Домрачавай, архітэктар Мікіта Домрачаў. Як паведаміў праваабарончы цэнтар «Вясна», яго адправілі ў ізалятар на Акрэсьціна. Сёньня ж быў затрыманы і вядомы беларускі архітэктар Кірыл Скарынін.
Людзі перакрылі вуліцу Прытыцкага
Людзі перакрылі вуліцу Прытыцкага на Каменнай Горцы, пратэстуюць супраць зьбіцьця дэманстрантаў.
Палітзьняволеных пачалі выпускаць?
На БТ паказалі, што зь СІЗА КДБ выпусьцілі на волю бізнэсоўца і сябра выбарчага штабу Віктара Бабарыкі Юрыя Васкрасенскага і дырэктара менскага офісу кампаніі PandaDoc Дзьмітрыя Рабцэвіча.
Жонка Юрыя Васкрасенскага Алеся пацьвердзіла Свабодзе, што Юрыю зьмянілі меру стрыманьня на хатні арышт.
Гэта адбылося пасьля ўчорашняга візыту Аляксандра Лукашэнкі ў ізалятар КДБ, дзе ён сустрэўся з палітзьняволенымі, сярод якіх былі і Юры Васкрасенскі, і Дзьмітры Рабцэвіч.
15 журналістаў так і не адпусьцілі. Іх прыйшлі падтрымаць калегі
15 журналістаў незалежных СМІ, якіх затрымалі да ці падчас пратэстнага маршу ў Менску, застаюцца ў Кастрычніцкім РУУС. Калегі перадалі для іх цёплыя рэчы, цыгарэты і ежу.
Вечаровыя ланцугі салідарнасьці ў розных раёнах Менску
Людзі выйшлі на пратэст у Лідзе
Нягледзячы на затрыманьнi, Ліда сёньня гуляла двойчы, пішуць чытачы, днём і ўвечары. А таксама лідчане ў цэнтры горада зрабілі «марш бульбы».
У Менску да РУУС прыяжджаюць «хуткія», забіраюць пацярпелых
Ля Маскоўскага, Фрунзэнскага, Ленінскага і Партызанскага РАУС у Менску бачылі машыны хуткай дапамогі, піша «Белсат» са спасылкай на валянтэраў. Зь Ленінскага РАУС «хуткая» зьвезла двух хлапцоў. З Партызанскага РАУС забралі дзяўчыну з пашкоджаным каленам.
Валянтэры каля Маскоўскага РУУС паведамляюць, што сюды даставілі каля 40 чалавек, у некаторых ёсьць траўмы ног і рук, чэрапна-мазгавыя траўмы, сінякі на твары, паведамляе Onliner. @motolkohelp удакладняе, што ў Маскоўскім РУУС 8-10 пацярпелых, іх забіраюць машыны хуткай дапамогі.
Дыялёг з вадамётам: што засьведчылі «Маршы гонару»
Што засьведчылі «Маршы гонару» на 64-ы дзень пратэстаў? Ці паўплывала на іх сустрэча Лукашэнкі зь вязьнямі СІЗА КДБ? Як грамадзтва ўспрыняло гэты дыялёг? У «Праскім акцэнце» абмяркоўваюць палітык, відэаблогер Вольга Карач і палітычныя аглядальнікі: зь БелаПАНу Аляксандар Класкоўскі, з «Нашай нівы» — Зьміцер Панкавец.
ШОК-ВІДЭА. «Калідор» сілавікоў зьбівае затрыманых
Яшчэ ў жніўні, пасьля пачатку пратэстаў, многія затрыманыя апавядалі, як у РУУС іх іх выводзілі з аўтазака і праганялі праз «калідор», дзе сілавікі іх зьбівалі. Сёньня тэлеграм-канал Nexta апублікаваў відэа, як гэта выглядала, зьнятае з аўтазака «падчас гарачай пары пратэстаў»: на ім міліцыянты стаяць у шэрагу і па чарзе б'юць дубінкамі затрыманых, якія праходзяць па «калідоры». Асьцярожна: шмат нецэнзурнай лексыкі!
Журналістку газэты «Наша слова» Алену Кавальчук выпусьцілі зь Ленінскага РАУС Горадні, яе трымалі там каля 4 гадзін. Склалі пратакол апытаньня ў межах артыкулу 22.9 і 23.34 (праца без акрэдытацыі і ўдзел у мітынгу), вядзецца праверка па абставінах сытуацыі.
Як ішла другая вялікая калёна ў Менску
Апроч асноўнай калёны дэманстрантаў, якая сабралася на вуліцы Калтварыйскай і рушыла да Пушкінскай, яшчэ адна шматтысячная калёна стартавала зь левага берагу Сьвіслачы. Яны прайшла вуліцамі Багдановіча, Куйбышава, праспекце Машэрава ў яго левабярэжнай частцы, Чарвякова.
Вось відэа і фота чытачоў «Нашай нівы», якія перадаюць атмасферу. Цікава, што журналістаў у гэтай калоне амаль не было.
У Берасьці на акцыі пратэсту затрымалі прынамсі 25 чалавек
Паводле слоў праваабаронца Раманf Кісьляка, з 14.00 у розных частках горада групы людзей з бел-чырвона-белымі сьцягамі выстройваліся ў ланцугі салідарнасьці. Каля 16.30 у цэнтры Брэста на пешаходнай вуліцы Савецкай сабралася больш за 150 чалавек. Калёнай яны прайшлі да набярэжнай Ф.Скарыны, скандуючы: «Верым, можам, пераможам!», «Жыве Беларусь!», «Лукашэнку ў аўтазак».
Сілавікі затрымлівалі ўдзельнікаў акцыі па ходзе руху калёны: каля кінатэатра «Беларусь», на скрыжаваньні Савецкай з праспэктам Машэрава, на набярэжнай. Пасьля 18.00 людзі разышліся, паведаміў БелаПАН.
У Наваградку некалькі дзясяткаў чалавек выйшлі ўдзень 11 кастрычніка ў цэнтар гораду зь белымі і чырвонымі балёнікамі. Стварылі ланцугі салідарнасьці. За імі сачыла міліцыя, аднак нікога не затрымалі.
У Менску шмат пацярпелых?
Да Маскоўскага РАУС у Менску прыяжджаюць і ад'яжджаюць машыны хуткай дапамогі, паведамляе тэлеграм-чат незалежнага абʼяднаньня мэдыкаў «Белые халаты».
У Горадні «Марш гонару» заблякавалі на галоўнай вуліцы
Некалькі сотняў чалавек прыйшлі на Савецкую плошчу ў Горадні 11 кастрычніка.
Гарадзенцы засьпявалі на плошчы «Тры чарапахі». Потым калёна з прыкладна 100-200 чалавек пайшла з Савецкай плошчы па Савецкай пешаходнай вуліцы. Унізе вуліцу перакрылі сілавікі. Людзі павярнулі і пайшлі зноў у накірунку Савецкай плошчы. Там вуліцу таксама перакрылі сілавікі. Больш за 10 чалавек затрымалі, у тым ліку, двух жанчын. Адной зь іх зламалі чырвона-белы парасон. Пасьля затрыманьняў пратэстоўцы разышліся.