Лінкі ўнівэрсальнага доступу

Сьвятлана Ціханоўская сустрэлася з Ангелай Мэркель


Сустрэча Сьвятланы Ціханоўскай з Ангелай Мэркель

Сьвятлана Ціханоўская 6 кастрычніка сустрэлася з канцлеркай Нямеччыны Ангелай Мэркель.

Сустрэча доўжылася 45 хвілін, паведамляе тэлеграм-канал Ціханоўскай. Сьвятлана Ціханоўская расказала, што мірныя мітынгі ў Беларусі працягваюцца, і таму рэжым працягвае павялічваць колькасьць палітвязьняў. Многія народныя лідэры, як Сяргей Ціханоўскі і Марыя Калесьнікава, застаюцца ў турме. Таму цяпер вельмі важна спыніць гвалт і вызваліць палітвязьняў.

Сьвятлана падкрэсьліла, што пратэсты ў Беларусі — гэта не барацьба супраць Расеі або на карысьць Эўропы: гэта наступства ўнутрыбеларускага крызісу. І галоўная мэта народу цяпер — новыя выбары. Важна, каб яны былі праведзеныя ў найбліжэйшым часе, бо 26 гадоў народ жыў пад ціскам — і трываць яго больш ня мае намеру.

Сьвятлана дадала, што беларускі народ таксама чакае інвэстыцыйнай падтрымкі, дапамогі незалежным мэдыя і грамадзянскім арганізацыям — для пераадоленьня наступстваў крызісу.

Сьвятлана таксама падаравала Ангеле бел-чырвона-белы парасон і кнігу «Краіна Беларусь» у нямецкім перакладзе.

Ціханоўская ў Бэрліне, 5 кастрычніка
Ціханоўская ў Бэрліне, 5 кастрычніка

Напярэдадні Ціханоўская сустрэлася з журналістамі і прадстаўнікамі беларускай дыяспары ў Нямеччыне. Яна параўнала падзеі ў Беларусі з падзеямі, якія папярэднічалі падзеньню Бэрлінскай сьцяны.

6 кастрычніка стала вядома, што амбасадар Нямеччыны зьедзе зь Менску для кансультацый. Напярэдадні зь Беларусі зьехалі амбасадары Польшчы і Літвы, а таксама стала вядома пра адʼезд кіраўніцтва дыпляматычных прадстаўніцтваў шэрагу іншых краін Эўразьвязу. Улады Беларусі 2 кастрычніка запатрабавалі ад Літвы і Польшчы скараціць колькасьць супрацоўнікаў амбасадаў. Беларускае МЗС абвінавачвае Польшчу і Літву ў падтрымцы акцый пратэсту.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG