У сьпісе затрыманых падчас акцый пратэсту ў Беларусі 4 кастрычніка, які складаюць праваабаронцы «Вясны», ужо больш за 200 чалавек. Сьпіс дапаўняецца.
Як паведамляюць праваабаронцы, людзей затрымлівалі ў Менску, Берасьці, Бабруйску, Віцебску, Гомлі, Горадні, Магілёве, Салігорску. Сярод сёньняшніх затрыманых — 17 журналістаў.
Большасьць журналістаў пасьля праверкі дакумэнтаў адпусьцілі з РУУСаў, але 5 чалавек засталіся ў ізалятарах да суду па адміністрацыйных працэсах: гэта чатыры бабруйскія журналісты (Алеся Лацінская, Юры Камісараў, Дзяніс Носаў, Марына Малчанава) і гомельская журналістка Надзея Пужынская. Меркавана, усіх будуць судзіць за ўдзел у несанкцыянаваных вулічных акцыях, паведамляе БАЖ.
Калі людзі пасьля завяршэньня маршу пачалі разыходзіцца, сілавікі ў форме і цывільныя з дубінкамі ўчынілі паляваньне на невялікія групы і адзіночных мінакоў. Відавочна, колькасьць дастаўленых у аддзяленьні міліцыі і ў ізалятары будзе расьці.
У менскай міліцыі прызналі факты выкарыстаньня вадамётаў супраць мірных удзельнікаў пратэсту, патлумачыўшы гэта неабходнасьцю астудзіць найбольш «агрэсіўна настроеную частку пратэстоўцаў».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў