Затрыманую напярэдадні ў Менску карэспандэнтку расейскага выданьня «МБХ медиа» Анастасію Альшанскую зьмясцілі ў ізалятар часовага ўтрыманьня ў Жодзіне. Пра гэта паведаміў яе адвакат Антон Гашынскі.
«Паколькі яе затрымалі ў суботу, а суды пачынаюць працаваць толькі ад панядзелка, гэта і ёсьць меркаваны час разгляду адміністрацыйнай справы. Аднак калі ў нядзелю будуць маштабныя акцыі і вялікая колькасьць затрыманых, суд можа прайсьці ў аўторак», — адзначыў абаронца.
Ён дадаў, што праз дыпляматычныя каналы была спроба «выцягнуць з-за кратаў» Анастасію Альшанскую ў суботу, але нічога не атрымалася.
Тым часам колькасьць зьняволеных журналістаў тэлеканалу «Белсат» дасягнула пяці. 26 верасьня падчас акцыі жанчын затрымалі Марыю Грыц. Не ўратавала нават тое, што дома ў яе 1,5-гадовае дзіця. Яна будзе чакаць суду.
24 верасьня каля Акрэсьціна міліцыянты схапілі Дзяніса Ганчарэнку і Аляксандра Любенчука. Кожнага суд пакараў 12 суткамі арышту і штрафамі па 810 рублёў. У той жа дзень асудзілі на 15 сутак Паўла Патапава.
Таксама 15 дзён арышту ў Гомлі адбывае Яўген Меркіс, якога затрымалі 14 верасьня.
