Лінкі ўнівэрсальнага доступу

Дзясяткі тысяч менчукоў выйшлі на марш пратэсту насуперак затрыманьням. Як прайшоў у Беларусі 50-ы дзень пратэстаў

абноўлена

Пасьля таемнай інаўгурацыі Аляксандра Лукашэнкі 23 верасьня заклікалі сёньня правесьці народную інаўгурацыю Сьвятланы Ціханоўскай, якую многія лічаць сапраўднай пераможцай выбараў 9 жніўня 2020 году.


Шматтысячнае шэсьце па праспэкце Незалежнасьці ў раёне парку Чалюскінцаў
21:43 27.9.2020

«Народная інаўгурацыя» Сьвятланы Ціханоўскай. Як прайшоў 50-ы дзень пратэстаў у Менску

21:26 27.9.2020

У Гомлі падчас затрыманьня моцна зьбілі фэльчарку Алену Давыдаву

Відавочцы паведамляюць, што фэльчарка з Гомля Алена Давыдава моцна зьбітая. Сёньня яе затрымалі на маршы супрацоўнікі АМАП, завезьлі ў Цэнтральны РАУС.

«Потым у аддзел міліцыі тройчы прыяжджала хуткая дапамога. Толькі што мы стаялі пад Цэнтральным РАУС і ўбачылі, што Алену Давыдаву зноў аднекуль цягнулі ў аддзел супрацоўнікі АМАП. Літаральна цягнулі, яна была практычна ў непрытомным стане», — расказаў валянтэр Ільля Міронаў.

20:58 27.9.2020

Праваабаронцам ужо вядомыя прозьвішчы больш як 200 затрыманых на сёньняшніх акцыях

Праваабаронцам «Вясны» ўжо вядомыя прозьвішчы больш як 200 затрыманых у Менску і рэгіёнах падчас сёньняшніх акцый пратэсту. Сьпіс працягвае дапаўняцца.

20:29 27.9.2020

Акцыя салідарнасьці зь Беларусьсю за мяжой

20:27 27.9.2020

«Народная інаўгурацыя» ў Пінску

19:25 27.9.2020

«Ланцуг салідарнасьці» ў Горадні

Каля моладзевага цэнтру «Галяктыка» некалькі чалавек зь бел-чырвона-белымі сьцягамі ўтварылі «ланцуг салідарнасьці». Іх гукамі сыгналаў падтрымлівалі аўтамабілі. Удзень тут брутальна затрымалі дзясяткі чалавек.

19:14 27.9.2020

Марш пратэсту ў Менску завяршыўся

На станцыі мэтро «Ўручча» калёна разышлася цалкам, паведамляе карэспандэнт Свабоды. Байцы АМАП у шлемах і балаклавах затрымліваюць асобных удзельнікаў.

18:56 27.9.2020

Менск: людзі разыходзяцца, ва Ўруччы пачаліся затрыманьні

Калёна дэманстрантаў, пасьля таго як яе пакінула шмат удзельнікаў, дайшла да мэтро «Ўручча». Тут людзі пачалі актыўна разыходзіцца ў розныя бакі, перадае карэспандэнт Свабоды. У Менску стала цёмна, ідзе дождж.

Каля гандлёвага цэнтра «Спэктар» ва Ўруччы пачаліся затрыманьні, калі людзі пачалі разыходзяцца невялікімі групамі. Карэспандэнт Свабоды быў сьведкам некалькіх затрыманьняў. АМАП правярае ў людзей торбы і дакумэнты.

18:48 27.9.2020

Людзей на дэманстрацыі ў Менску паменела

Удзельнікаў менскага маршу пратэсту стала меней: частка людзей пайшла далей у бок мэтро «Ўручча», частка вяртаецца ў цэнтар гораду, іншыя разыходзяцца. Стала цёмна, ідзе дождж. Транспарт па праспэкце Незалежнасьці ідзе па адной паласе, бліжэйшыя станцыі мэтро зачыненыя.

18:35 27.9.2020

Шматтысячны менскі марш у фота

18:29 27.9.2020

Калёна ў Менску дайшла да Ўсходніх могілак

Нягледзячы на тое, што некаторыя разыходзяцца, значная частка людзей з дэманстрацыі пратэсту застаецца на праспэкце Незалежнасьці, пратэстоўцы ўжо дайшлі да Ўсходніх могілак. Людзі занялі палову праезнай часткі, пры гэтым павольна рухаецца і транспарт.

МУС тым часам прызнае затрыманьне «каля 200» пратэстоўцаў па ўсёй краіне. Праваабаронцам вядомыя імёны 92 затрыманых, сьпіс пастаянна дапаўняецца.

18:22 27.9.2020

Дэманстранты ў Менску пачалі разыходзіцца

Частка людзей з калёны, якая дайшла да Нацыянальнай бібліятэкі, рухаецца далей на праспэкце Незалежнасьці, у бок Барысаўскага тракту, частка людзей павярнула на вуліцу Філімонава і Каліноўскага. Людзі пачынаюць разыходзіцца.

Рух па праспэкце Незалежнасьці ад станцыі мэтро «Ўсход» у бок МКАД не перакрыты, людзі працягваюць ісьці па праезнай частцы праспэкта Незалежнасьці ў бок Уручча, адначасова рухаецца і транспарт.

18:12 27.9.2020

18:11 27.9.2020

Дэманстранты павесілі нацыянальны сьцяг ля Нацыянальнай бібліятэкі

Каля Нацыянальнай бібліятэкі дэманстранты заўважылі мачты для сьцягоў і ўзьнялі на адной зь іх бел-чырвона-белы сьцяг з Пагоняй. Людзі рушылі далей да гандлёвага цэнтру «Дана Мол», дайшлі да станцыі мэтро «Ўсход».

18:01 27.9.2020

Менск: калёна каля Нацыянальнай бібліятэкі

Пратэстоўцы крочаць па праспэкце Незалежнасьці. Міліцыя праз дынамікі зьвяртаецца да людзей з просьбай разысьціся. Некаторыя разыходзяцца, паведамляе карэспандэнт Свабоды, але большасьць рухаецца далей.

Калёна пратэстоўцаў дайшла да Нацыянальнай бібліятэкі, людзі рухаюцца па праспэкце Незалежнасьці далей.

17:53 27.9.2020

У Горадні пачалі выпускаць затрыманых

У Горадні выпусьцілі з ізалятара 53-гадовую Яніну. Яна каталічка, падчас акцыі на моладзевым цэнтры «Галяктыка» малілася на ружанцы. Калі ўбачыла, што жорстка затрымліваюць мужчын, аднаму разьбілі твар, то схапіла яго і паспрабавала адстаяць ад сілавікоў. Тады забралі і яе, і мужчыну.

Яніне выпісалі пратакол за ўдзел у мітынгу. З пратаколу яна даведалася, што ўдзельнічала ў інаўгурацыі Сьвятланы Ціханоўскай.

17:49 27.9.2020

У Менску зачынілі станцыі мэтро «Маскоўская» і «Ўсход»

Менскі мэтрапалітэн паведаміў пра закрыцьцё з 17.33 станцый першай лініі «Маскоўская» і «Ўсход», да якіх рухаюцца ўдзельнікі маршу пратэсту.

У 17.34 адкрыўся вэстыбюль станцыі «Плошча Леніна» з боку чыгуначнага вакзалу. З боку плошчы Незалежнасьці ўваход пакуль зачынены. Застаюцца зачыненымі станцыі першай лініі «Кастрычніцкая», «Плошча Перамогі» і «Плошча Якуба Коласа», а таксама станцыя другой лініі «Купалаўская».

17:46 27.9.2020

Дэманстрантаў у Менску просяць разысьціся

На праспэкце Незалежнасьці каля БАТУ да калёны дэманстрантаў з дынамікаў зьвярнулася міліцыя з просьбай разысьціся, іначай «будуць ужытыя захады ў адпаведнасьці з законам».

Каля станцыі мэтро «Маскоўская» спыніўся белы аўтобус, сілавікі затрымалі раварыста, дэманстранты хацелі яго адбіць, але не змаглі. Аўтобус зьехаў.

17:43 27.9.2020

Акцыя пратэсту ў Салігорску

17:37 27.9.2020

У Менску ў дэманстрацыі прымаюць удзел да 100 тысяч чалавек

Такія ацэнкі карэспандэнтаў Інтэрфакса. У калёне на праспэкце Незалежнасьці людзі запалілі ліхтары на тэлефонах. Выглядае відовішчна на фоне прыцемак і лёгкага дажджу, паведамляе карэспандэнт Свабоды. Калёну вітаюць жыхары дамоў па праспэкце Незалежнасьці і прадаўцы крамаў.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG