Лінкі ўнівэрсальнага доступу

Намесьнік міністра замежных спраў Украіны: «Улады Беларусі парушаюць сваё ўласнае заканадаўства»


Хасіды на памежным пункце пропуску

Намесьнік міністра замежных спраў Украіны Яўген Енін лічыць, што за сытуацыю, калі на беларуска-ўкраінскй мяжы сабраліся некалькі соцень паломнікаў з Ізраілю, нясуць адказнасьць беларускія ўлады.

– Мы літаральна некалькі тыдняў таму апавясьцілі нашых партнэраў, у тым ліку беларускіх, пра тое, што наш урад прыняў рашэньне аб забароне ўезду іншаземцаў на тэрыторыю Украіны, што было зьвязана з рэзкім пагаршэньнем эпідэмічнай сытуацыі. І мы разьлічваем, што любая іншая дзяржава — Беларусь, Польшча, Малдова — будзе дзейнічаць адпаведным чынам.

Што мы бачым з боку беларускіх уладаў? Яны ўводзяць такія ж абмежаваньні на ўезд іншаземцаў. Яны літаральна некалькі дзён таму ўносяць той жа самы Ізраіль у чырвоны сьпіс: для грамадзян, якія прыбываюць з гэтай дзяржавы, забаронены нават элемэнтарна транзыт. Але беларускія ўлады вырашаюць парушыць чамусьці сваё ўласнае заканадаўства і дазваляюць уезд на тэрыторыю сваёй краіны соцень і соцень прадстаўнікоў Дзяржавы Ізраіль. Больш за тое, яны ствараюць умовы для іх транзыту ў бок украінска-беларускай мяжы. Яны сьвядома садзейнічаюць таму, каб у раёне пунктаў пропуску была вялікая колькасьць людзей, што, відавочна, не спрыяе прафіляктыцы распаўсюджваньня COVID-19.

Напэўна, пра гэта лепш спытаць кіраўніцтва Беларусі, чым менавіта правініліся хасіды перад кіраўніцтвам беларускага рэжыму. Нам самім вельмі непрыемна ад гэтай сытуацыі, таму што ўсёй гэтай праблемы і крызісу можна было б лёгка пазьбегнуць, калі б рэагаваць адпаведным цывілізаваным спосабам. Хацеў прывесьці ў прыклад кіраўніцтва Рэспублікі Малдовы, якая літаральна ўчора адмовіла ва ўезьдзе транзытам праз Малдову ў бок Украіны больш як 60 прадстаўнікам хасідзкіх паломнікаў, сказаў у інтэрвію «Настоящему времени» намесьнік міністра замежных спраў Украіны Яўген Енін.

Ня менш за паўтары тысячы габрэяў-хасідаў з ЗША, Вялікай Брытаніі і Ізраілю ўжо некалькі дзён знаходзяцца на мяжы Беларусі і Ўкраіны. Паломнікі ехалі ва Ўкраіну да магілы заснавальніка Брацлаўскага хасідызму цадзіка Нахмана. Асноўны іх паток прыяжджае ў горад Умань, дзе знаходзіцца магіла, напярэдадні габрэйскага Новага году (Рош ха-Шана) – сёлета ён прыпадае на 19 верасьня. 16 верасьня Кабінэт міністраў Украіны закрыў пункт пропуску «Новыя Ярылавічы» на мяжы зь Беларусьсю ў Чарнігаўскай вобласьці і заклікаў Менск «не даваць надзеі» хасідам на тое, што іх пусьцяць ва Ўкраіну.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG