Лінкі ўнівэрсальнага доступу

Што вядома пра Сьцяпана Латыпава, абаронцу муралу на «плошчы Перамен», якому пагражае крымінальны артыкул


Сьцяпан Латыпаў, архіўнае фота
Сьцяпан Латыпаў, архіўнае фота

Свабода сабрала зьвесткі пра жыхара менскай «плошчы Перамен» (двара па Сморгаўскім тракце, 1) Сьцяпана Латыпава. На яго завялі крымінальную справу за тое, што невядомых у масках, якія прыйшлі зьнішчаць выяву дыджэяў, ён ветліва прасіў прадставіцца.

Латыпаў на Акрэсьціна, перадачу ад суседзяў прынялі

Сьцяпана Латыпава затрымалі 15 верасьня ў ягоным двары каля знакамітага муралу з «дыджэямі перамен». Пасьля дзьверы ў кватэру ўзламалі, учынілі ператрус, забралі флэш-карты, мабільныя тэлефоны, ноўтбукі, ключы ад аўтамабіля, банкаўскія карты і наяўныя грошы.

Калі Сьцяпана выводзілі з пад’езду, суседзі крычалі «Ганьба». Адвакат Ільля Пярхальскі паведаміў, што на Латыпава завялі справу паводле артыкула 293 Крымінальнага кодэксу (удзел у масавых беспарадках).

У Сьцяпана Латыпава два адвакаты: Кацярына Жаўтанога і Ільля Пярхальскі. Яны пад падпіскай аб невыдаваньні, таму падрабязнасьцяў расказаць ня могуць.

Кацярына Жаўтанога ў сераду паведаміла Свабодзе, што са Сьцяпанам усё ў парадку, ён у ізалятары на Акрэсьціна. Суседзям удалося вырашыць праблему зь перадачай (сваякоў у Сьцяпана ў Менску няма). Перадалі ў ЦІП усё неабходнае.

Унікальны для Беларусі спэцыяліст

Сьцяпану Латыпаву 40 гадоў. Родам ён зь Берасьцейскай вобласьці, вучыўся ў беларускай школе. Бацькі — біёлягі. Па прафэсіі Сьцяпан арбарыст, а таксама прамысловы альпініст 5 разраду.

Арбарыст — вельмі рэдкая для Беларусі прафэсія, такіх адмыслоўцаў у краіне каля 50 чалавек. У Эўропе арбарыстаў называюць яшчэ «дрэўнымі хірургамі». Іх задача — не сьпілаваць дрэва, а выратаваць яго. Веды пра дрэвы далі Сьцяпану бацькі-біёлягі і падручнікі.

Сьцяпан прайшоў прафэсійную падрыхтоўку і сэртыфікацыю ў Вялікай Брытаніі, мае сэртыфікат IRATA (для тых, хто выконвае работы на вышыні).

Сьцяпан Латыпаў мае сваё ІП, ён дырэктар «Беларба». Ён прыводзіў у парадак, «лячыў» дрэвы ў рэзыдэнцыі прэзыдэнта, у VIP-кліентаў, супрацоўнічае з «Дыпсэрвісам».

Чытае лекцыі ў Беларускім дзяржаўным тэхналягічным унівэрсытэце.

У Менску ў кватэры на Сморгаўскім жыве адзін, безь сям’і.

Пэрфоманс каля замаляванага мурала. 10 верасьня
Пэрфоманс каля замаляванага мурала. 10 верасьня

Суседзі падтрымліваюць Сьцяпана Латыпава

Мастак Андрэй Дубінін жыве побач са знакамітым дваром, дзе зьявіўся мурал «Перамен!» Ён сказаў Свабодзе, што ў сераду ўвечары жыхары суседніх дамоў выйдуць у двор у падтрымку Сьцяпана Латыпава, які цяпер на Акрэсьціна.

Стужкі, якія людзі павязалі ў аўторак увечары на агароджу, уначы зрэзалі — людзі з вокнаў бачылі, як з 3-й да 5-й раніцы невядомыя іх зьнішчалі. Прычым абразалі толькі белыя і чырвоныя, кажа Андрэй Дубінін.

Андрэй Дубінін
Андрэй Дубінін

«Засталіся толькі зялёныя і чырвоныя. Людзі, якія іх вяжуць, робяць такую інкарпарацыю: частка бел-чырвона-белая, а для прыхільнікаў чырвона-зялёнага сьцяга стужкі інкарпараваныя ў бела-чырвона-зялёна-белы колеры, то бок засталася палова агароджы зь зялёнымі ўпляценьнямі», — кажа мастак Андрэй Дубінін.

У сераду зранку каля мурала нікога зь міліцыянтаў не было, хоць цягам апошняга тыдня 24 гадзіны на суткі яго ахоўвалі як мінімум па 3 міліцыянты і ў двары пастаянна стаяў міліцэйскі «бобік», дадае Андрэй Дубінін.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG