Праца грамадзянскай плятформы далей будзе арганізаваная ў рамках агульнанацыянальнага руху, для чаго мяркуецца сфармаваць арганізацыйны камітэт.
Усім ахвотным прапануецца запісвацца дзеля салідарнасьці з арыштаванымі і высланымі чальцамі прэзыдыюму.
«Улада спрабуе перашкодзіць нашай працы — арыштамі, пагрозамі, высылкамі за мяжу, — заявіла Сьвятлана Ціханоўская. — Усё гэта адчулі на сабе сябры прэзыдыюму Каардынацыйнай рады, якая прадстаўляе інтарэсы ўсіх нас. Дакажам, што такімі мэтадамі беларусаў не спыніць. Захаваць працу рады можна толькі масавым далучэньнем і салідарнасьцю. Хай нас будуць сотні тысяч! Мы ня будзем трываць зьнявагі, гвалт і зьдзекі яшчэ 5 гадоў. Працягнем барацьбу за нашу перамогу для новай Беларусі».
У сеціве разьмешчаны зварот арганізацыйнага камітэту агульнанацыянальнага руху.
Мы, грамадзяне Рэспублікі Беларусь, падтрымліваем створаную на ініцыятыву Сьвятланы Ціханоўскай Каардынацыйную раду. Делэгуем прэзыдыюму ў складзе Сьвятланы Алексіевіч, Ліліі Ўласавой, Сяргея Дылеўскага, Максіма Знака, Вольгі Кавальковай, Марыі Калесьнікавай, Паўла Латушкі прадстаўляць нашыя інтарэсы ў наступных пытаньнях:
- Аднаўленьне законнасьці ў Рэспубліцы Беларусь
- Арганізацыя працэсу пераадоленьня палітычнага крызісу і забесьпячэньня згоды ў беларускім грамадзтве
- Абарона сувэрэнітэту і незалежнасьці Рэспублікі Беларусь.
Таксама аргкамітэт далучаецца да наступных патрабаваньняў у адрас дзейнай улады:
- Спыніць перасьлед грамадзянаў Беларусі з палітычных матываў
- Прыцягнуць да адказнасьці вінаватых у рэпрэсіях супраць мірных маніфэстантаў
- Вызваліць усіх палітзьняволеных, адмяніць неправамерныя судовыя пастановы, выплаціць кампэнсацыю пацярпелым
- Прызнаць прэзыдэнцкія выбары 9 жніўня несапраўнымі
- Правесьці новыя выбары паводле міжнародных стандартаў з новым складам выбарчых камісій усіх узроўняў.
Паведамляецца, што любы грамадзянін Рэспублікі Беларусь можа ўступіць у пашыраны склад Каардынацыйнай рады і далучыцца да яго актыўнай працы.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў