Лінкі ўнівэрсальнага доступу

«60 тысяч беларускіх штыкоў будуць ваяваць за Расею». Зьявіліся новыя заявы Лукашэнкі расейскім СМІ 


Аляксандар Лукашэнка падчас выступу перад прыхільнікамі, 16 жніўня

Беларускія сілавікі не парушылі закону пры разгоне акцый пратэсту, яны выконвалі свае задачы для стабілізацыі становішча. Пра гэта заявіў Аляксандар Лукашэнка ў інтэрвію расейскім СМІ, якое паказаў 9 верасьня тэлеканал Russia Today.

УЖЫВУЮ Месяц пратэстаў. Калесьнікава на Валадарскага. Ціханоўская ў Варшаве. Знака затрымалі. Ператрусы ў Каардынацыйнай радзе

«АМАП выратаваў нас, як цяпер бачым, ад бліцкрыгу»

«На вуліцах працуюць АМАП і ўнутраныя войскі. Гэта іх задача — стабілізацыя становішча, утрымаць краіну. Яны парушылі закон? Не», — сказаў Лукашэнка, дадаўшы, што пратэстоўцы мелі намер 9 і 10 жніўня захапіць урадавыя ўстановы.

«АМАП выратаваў нас, як мы цяпер усе бачым, ад бліцкрыгу. Каб ня гэтыя хлопцы, зноў жа, мы тут не сядзелі б з вамі. Яны супрацьстаялі гэтаму», — пахваліў сілавікоў Лукашэнка.

На яго перакананьне, беспарадкамі ў Беларусі кіруюць амэрыканцы праз цэнтар пад Варшавай. Пры гэтым дадаў, што ніякай дэстабілізацыі ў Беларусі няма.

«Выбег з аўтаматам, каб паказаць, што не баязьлівец»

Таксама Аляксандар Лукашэнка патлумачыў, чаму выйшаў зь верталёта з аўтаматам у руках падчас пратэстаў 23 жніўня.

«Я паказаў, што я на месцы, што я не баязьлівец і іх не баюся», — сказаў ён, адказваючы на пытаньне аб матывах зьяўленьня ў кадры з аўтаматам у руках.

Удакладніў, што за гадзіну да яго зьяўленьня ў Палацы Незалежнасьці некаторыя Telegram-каналы падалі інфармацыю, што ён уцёк. Таму, маўляў, павінен быў паказаць, што тыя зьвесткі «непраўдзівыя і не адпавядаюць рэальнасьці».

«33 расейцы — правакацыя спэцслужбаў ЗША і Ўкраіны»

Аляксандар Лукашэнка прызнаўся, што самастойна прыняў рашэньне аб затрыманні 33 расейцаў сёлета ў ліпені.

«Я кажу сілавікам: прыйдзецца іх затрымліваць, каб не было бяды. Затрымалі», — сказаў Лукашэнка, расказваючы пра даклад старшыні КДБ Валера Вакульчыка, які казаў пра «вельмі вялікія рызыкі», што могуць не справіцца ўсіх адсачыць і нэўтралізаваць адначасова.

Ён заявіў, што дагэтуль ня ведае, навошта прыязджалі тыя расейцы. Але схільны верыць, што гэта «правакацыйная апэрацыя спэцслужбаў ЗША і Украіны».

«Беларусь уступіць у вайну ў выпадку агрэсіі супраць Расеі»

Беларусь уступіць у вайну, калі з боку заходніх краін пачнецца агрэсія супраць Расеі, запэўніў Лукашэнка ў інтэрвію расейскім СМІ.

«Калі б хтосьці ажыцьцяўляў агрэсію супраць Расеі, настае зона адказнасьці АДКБ і нашай саюзнай дзяржавы. Беларуская армія — 60-65 тысяч штыкоў. Яна ўступае ў вайну. І расейская групоўка, яна таксама прапісаная ў пляне, разам з намі супрацьстаіць агрэсіі на заходнім кірунку».

Каб раптам нешта здарылася на заходнім кірунку, на поўначы або на поўдні, Беларусь неадкладна абараняла б Расею, яшчэ раз паўтарыў Аляксандар Лукашэнка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG