Напярэдадні візыту ў Маскву Аляксандар Лукашэнка даў інтэрвію прадстаўнікам расейскіх СМІ. «Так, магчыма, я крыху пераседзеў», — заявіў ён.
У менскім Палацы незалежнасьці на інтэрвію з Лукашэнкам сабраліся журналісты з Расеі. Тут была галоўная рэдактарка міжнароднага тэлеканалу Russia Today Маргарыта Сіманьян, чые падначаленыя былі кінутыя на ўзмацненьне беларускім тэлевізійнікам пасьля звальненьня мясцовых журналістаў і тэхнічных супрацоўнікаў.
Карэспандэнт тэлеканалу «Россия-1» Яўген Ражкоў пасьля інтэрвію з Лукашэнкам у жывым эфіры праграмы «60 минут» расказаў пра некаторыя моманты з інтэрвію з Аляксандрам Лукашэнкам.
Марыя Калеснікава, паводле Аляксандра Лукашэнкі, хацела ўцячы ва Ўкраіну, бо мае там сястру. Як памежнік Лукашэнка лічыць правільным, што яе затрымалі. Двух іншых просяць Ўкраіну вярнуць.
Што да пратэстаў, то, паводле Аляксандра Лукашэнкі, за імі стаяць амэрыканцы, якія дзейнічаюць праз Польшчу і Чэхію.
На пытаньне пра ўнутраныя прычыны пратэсту Лукашэнка адказаў:
«Так, магчыма, я крыху пераседзеў; так, магчыма, мяне паказваюць з праса і чайніка, але толькі я магу цяпер абараніць Беларусь».
Другой унутранай прычынай пратэсту Лукашэнка назваў тое, што вырасла два новыя пакаленьні і сфармаваўся невялікі пласт «буржуйчыкаў», якія хочуць улады.
Наконт зьбіцьця дэманстрантаў сілавікамі Лукашэнка сказаў, што гэта «былі першыя гарачыя эмоцыі». Але амапаўцаў нельга папракаць, бо яны абаранілі краіну ад бліц-крыга. А з празьмерным ужываньнем сілы ён паабяцаў разьбірацца.
Таксама запрасілі карэспандэнта «Первого канала» Антона Вярніцкага, вядоўцу праграмы «Вести» на тэлеканале «Россия-1» Яўгена Ражкова і галоўнага рэдактара радыёстанцыі «Говорит Москва» Рамана Бабаяна.
Зьмест размовы не агалошваецца. Праўладны тэлеграм-канал «Пул первого» толькі выклаў здымак, дзе Лукашэнка і Сіманьян стаяць разам.
