Лінкі ўнівэрсальнага доступу

Лукашэнка сказаў, што на БТ журналісты «чакалі рэвалюцыі», і падзякаваў Russia Today за дапамогу


Аляксандар Лукашэнка ў інтэрвію карэспандэнту расейскага тэлеканалу RT Канстанціну Прыдыбайлу падзякаваў расейскім журналістам за падтрымку ў арганізацыі працы беларускага дзяржаўнага тэлебачаньня — пасьля масавага сыходу і страйку супрацоўнікаў.

На апублікаваных RT кадрах Лукашэнка кажа, што некаторыя беларускія журналісты пасьля пачатку пратэстаў у краіне «хайпанулі на гэтай тэме».

«Яны ўжо загадзя сфармавалі адзін канал, другі, трэці, калектыў, і чакалі, калі рэвалюцыя адбудзецца. Вы разумееце, у гэты складаны пэрыяд наколькі былі важныя вы для нас. І тое, што вы тэхнічна паказалі, тэхнары вашыя, і журналісты... і кіраўніца вашая. Гэта вельмі дорага каштуе», — кажа Лукашэнка.

Раней агенцтва РБК, са спасылкай на некаторых супрацоўнікаў Белтэлерадыёкампаніі, напісала, што дапамогу ў арганізацыі працы каналу — пасьля страйку многіх журналістаў і тэхнічных супрацоўнікаў — пачалі аказваць супрацоўнікі RT.

У прэс-службе RT агенцтву РБК заявілі, што Лукашэнка пахваліў журналістаў расейскага каналу «за добрую працу», але пра дэталі гэтай працы прадстаўнік каналу не паведаміў.

Кіраўніца Russia Today Маргарыта Сіманьян адмаўляла, што супрацоўнікі каналу былі накіраваныя ў Менск для працы ў Белтэлерадыёкампаніі. Аднак Лукашэнка падзякаваў і ёй.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG