Лінкі ўнівэрсальнага доступу

16-ы дзень пратэстаў, затрыманьні лідэраў страйкамаў. Што адбываецца ў Беларусі

Што адбываецца ў Беларусі на 16-ы дзень пратэстаў супраць фальсыфікацыі прэзыдэнцкіх выбараў, якія адбыліся два тыдні таму.

09:43 24.8.2020

АБСЭ зноў прапанавала ўладам Беларусі пасярэдніцтва

У лісьце да Аляксандра Лукашэнкі дзейны кіраўнік арганізацыі, прэмʼер Альбаніі Эдзі Рама і яго пераемніца, кіраўнік МЗС Швэцыі Ан Ліндэ заявілі, што АБСЭ «пільна і з занепакоенасьцю» сочыць за сытуацыяй у Беларусі. Яны адзначылі, што гатовыя прыехаць у краіну, каб выслухаць думкі пра цяперашнюю сытуацыю і абмеркаваць надзённыя выклікі. Першы раз Рама і Ліндэ прапанавалі супрацоўніцтва яшчэ 17 жніўня, але тая прапанова не была прынятая.

09:46 24.8.2020

Актор Алег Басілашвілі: Падтрымліваю маіх беларускіх пабрацімаў

Народны артыст СССР, актор Алег Басілашвілі выступіў з падтрымкай калектыву Купалаўскага тэатру.

«Падтрымліваю маіх беларускіх тэатральных пабрацімаў, а таксама мастацкага кіраўніка тэатра імя Янкі Купалы, рэжысэра Мікалая Пінігіна. Мы шмат працавалі зь ім на сцэне БДТ.

Без жаху немагчыма глядзець на зьдзекі ўладаў над мірным народам. У любога нармальнага чалавека сэрца абліваецца крывёй, калі ён глядзіць на пакуты людзей, якія адважыліся ажыцьцявіць сваё канстытуцыйнае права — выказаць сваю думку».

09:48 24.8.2020

«Як у кіно пра канцлягер». Чатыры гісторыі пра тое, як білі і катавалі ў Віцебску

Мы пагутарылі зь віцяблянамі, якіх затрымлівалі 9 жніўня — перад выбарчым участкам, падчас шпацыру, у цэнтры гораду, каля дому. Іх зьбівалі і трымалі за кратамі. Яны расказалі пра фізычны боль і маральны ціск. Пра стаўленьне як да злачынцаў. Хоць закону яны не парушалі. Парушаліся іх правы.

09:51 24.8.2020

Былая прэзыдэнтка Літвы: «Лукашэнку трэба палітычна і дыпляматычна ізаляваць»

Сьвет больш ня можа весьці двайную гульню з рэжымам Аляксандра Лукашэнкі, яго трэба палітычна і дыпляматычна ізаляваць, сказала экс-прэзыдэнт Літвы Даля Грыбаўскайце.

«Гэты рэжым павінен быць ізаляваны палітычна і дыпляматычна, у дачыненьні да прадстаўнікоў Беларусі (не народу) павінны ўжывацца ня толькі палітычныя, але і эканамічныя санкцыі», — цытуе словы Грыбаўскайце Delfi.

«Гэты рэжым павінен ведаць, як яго ацэньвае сьвет. Хопіць гуляць і сядзець на двух крэслах, як збольшага рабіў Захад і мы: як быццам нешта бачым, чагосьці ня бачым, бо эканамічныя сувязі важныя», — сказала экс-прэзыдэнтка.

10:40 24.8.2020

Гэты партрэт Лукашэнкі зроблены з фота людзей, зьбітых і скалечаных сілавікамі ў Беларусі пасьля прэзыдэнцкіх выбараў. Каляж зрабіла беларуска з Італіі, яго паказалі на акцыі салідарнасьці ў Міляне: «Гэта адказ на тое, што 60% фота пра зьбіцьцё нібыта зьяўляюцца пастаноўкай».

10:40 24.8.2020

Зяленскі прысвоіў Міхалку званьне «Заслужаны артыст Украіны»

Беларускі музыка лідэр гуртоў BRUTTO, «Ляпіс-98» (у мінулым «Ляпіс Трубяцкі») і Drezden Сяргей Міхалок атрымаў званьне заслужанага артыста Ўкраіны.

Аб уручэньні ўзнагароды абвясьціў прэзыдэнт Уладзімір Зяленскі на Сафійскай плошчы ў Кіеве на сьвяткаваньні Дня Незалежнасьці і ўручыў яе музыку асабіста.

10:48 24.8.2020

У Жабінцы хаваюць Генадзя Шутава, якому стрэлілі ў галаву падчас акцыі пратэсту

У Жабінцы хаваюць Генадзя Шутава — трэцюю ахвяру гвалту сілавікоў падчас акцый пратэстаў. Яго паранілі ў галаву 11 жніўня каля Маскоўскага райвыканкаму Берасьця. 19 жніўня Шутаў памёр у вайсковым шпіталі ў Менску. Цела нябожчыка доўгі час не аддавалі сямʼі.

Генадзь Шутаў
Генадзь Шутаў

11:24 24.8.2020

МУС: У Менску мітынгавала каля 20 тысяч

Прэс-сакратарка МУС Беларусі ў сваім тэлеграм-канале заявіла, што максымальная колькасьць удзельнік мітынгу ў Менску склала каля 20 тысяч чалавек. У Берасьці і Горадні — ня больш за тры тысячы чалавек.

«Усяго за мінулыя суткі за парушэньне заканадаўства аб масавых мерапрыемствах складзена 79 пратаколаў аб адміністрацыйных правапарушэньнях», — інфармуе прэс-служба МУС.

Ведамства нагадала, што за несанкцыянаваныя масавыя мерапрыемствы прадугледжаная як адміністрацыйная, так і крымінальная адказнасьць

11:34 24.8.2020

Мінабароны спыніла парушальнікаў паветранай прасторы Беларусі. Імі былі паветраныя балёнікі

Міністэрства абароны Беларусі спыніла парушальнікаў паветранай прасторы Беларусі. Імі былі паветраныя балёнікі. Рыхтуецца афіцыйная нота.

«23 жніўня прыблізна а 19:30 дзяжурнымі сіламі ВПС і войскаў СПА была спыненая правакацыя з боку Літоўскай Рэспублікі», паведамляе Мінабароны Беларусі. Над Ашмянскім раёнам «з сумежнай тэрыторыі быў запушчаны зонд з васьмі паветраных шароў з антыдзяржаўнай сымболікай».

З дапамогай верталётаў парушальнікі былі спыненыя. Зброя не ўжывалася. Рыхтуецца нота.

11:39 24.8.2020

Ля МТЗ затрымалі двух сябраў Каардынацыйнай рады Кавалькову і Дылеўскага

Сябраў прэзыдыюму Каардынацыйнай рады Вольгу Кавалькову і Сяргея Дылеўскага затрымалі на прахадной МТЗ супрацоўнікі АМАПу і зьмясцілі ў аўтазак.

Пра гэта Свабодзе паведаміў паплечнік Кавальковай Дзяніс Садоўскі.

Сёньня а 13-й заплянаваная прэсавая канфэрэнцыя Каардынацыйнай Рады.

11:40 24.8.2020

Вядомы расейскі панк-гурт «Элизиум» апублікаваў кліп на песьню «Жыве Беларусь». Куплеты песьні на расейскай мове, а прыпеў — па-беларуску

11:42 24.8.2020

На месца Караніка Лукашэнка прыўначыў ягонага намесьніка Піневіча. Хто гэта?

Выканаўцам абавязкаў міністра аховы здароўя прызначылі 52-гадовага Дзьмітрыя Піневіча, піша БелТА. Да таго ён быў першым намесьнікам міністра.

Пачынаў кар’еру хірургам у менскай паліклініцы, стаў у 1999 годзе галоўным доктарам 6-й гарадзкой клінічнай лякарні Менску, пасьля з 2002 да 2011 быў старшынём камітэту аховы здароўя Менгарвыканкаму, урэшце 9 гадоў быў на пасадзе першага намесьніка міністра здароўя. Таксама зьяўляецца старшынём мэдычнай і антыдопінгавай камісіі Нацыянальнага алімпійскага камітэту.

Былога міністра аховы здароўя Ўладзімера Караніка Лукашэнка паставіў кіраваць Горадзенскім аблвыканкамам.

11:43 24.8.2020

Аўстрыя. Каля амбасады Беларусі ў Вене прайшла акцыя салідарнасьці зь Беларусьсю

11:57 24.8.2020

«Апазнаньня цела Мікіты Крыўцова ня будзе», — адвакат

Небходнасьць у апазнаньні цела Мікіты Крыўцова сваякамі адсутнічае ў сувязі з тым, што ягоная асоба ўстаноўлена. Гэтак, паводле адваката Віктара Мацкевіча, паведамілі яму ў Партызанскім раённым аддзеле Сьледчага камітэту. Цела Мікіты Крыўцова было знойдзена 22 жніўня ў лесапаласе ў межах Менску. Паводле паведамленьня Сьледчага камітэту, Мікіта Крыўцоў задушыўся, сьлядоў крымінальнага характару на целе не было. 23 жніўня знайшлося відэа, на якім Мікіта Крыўцоў стаіць перад шэрагам АМАПу зь бел-чырвона-белым сьцягам на плошчы ў Маладэчне. Відэа зьнялі ўвечары 9 жніўня.

12:20 24.8.2020

Што за зброя была ў Мікалая Лукашэнкі і ці можа яе насіць падлетак


23 жніўня пасьля маштабных акцый пратэсту ў Менску ў Палац Незалежнасьці прыляцеў на верталёце Аляксандар Лукашэнка з малодшым сынам Мікалаем. Абодва былі ў бронекамізэльках і са зброяй у руках. Што гэта была за зброя?

12:22 24.8.2020

Беларусь парушыла паветраную прастору Літвы, перасьледуючы балёнікі

24 жніўня літоўскі МЗС уручыў амбасадару Беларусі ноту пратэсту супраць парушэньня дзяржаўнай мяжы Літвы, паведамляе МЗС краіны.

У МЗС Літвы паведамілі, што беларускі верталёт Мі-24 23 жніўня ў 18.50 перасек літоўскую дзяржаўную мяжу ў раёне вёскі Мядзінінкай. У ноце Менск заклікаюць да тлумачэньня і недапушчэньня падобных парушэньняў.

Крыху раней Мінабароны Беларусі заяўляла, што зь літўскага боку ў Беларусь былі запушчаныя паветраныя балёнікі з «антыдзяржаўнай сымболікай», якія былі «спыненыя з дапамогай верталётаў».

12:23 24.8.2020

Лукашэнка загадаў звальняць настаўнікаў, якія «перамятнуліся» у іншы лягер

Аляксандар Лукашэнка прыняў з дакладам міністра адукацыі Ігара Карпенку. Запатрабаваў абараніць настаўнікаў у школах ад нападак і звольніць тых, хто «здрадзіў».

«Абараніце настаўнікаў ад усялякіх нападак. Мы гэта ўжо пачалі рабіць. Робім вельмі актыўна і вельмі жорстка перарываем ўсялякія наезды, накаты на настаўнікаў, лекараў», — сказаў Лукашэнка.

Ён таксама загадаў не цырымоніцца з тымі настаўнікамі, якія раптам «перафарбаваліся», цытуе яго БелТА.

«Калі хтосьці перакінуўся ў іншы лягер, нам таксама трэба зь імі разабрацца. — У Беларусі дзяржаўная адукацыя, дзяржаўныя школы, дзяржаўная ідэалёгія. Хто хоча кіраваццца гэтым прынцыпам — калі ласка, ідзіце выкладаць, вучыце, працуйце. Хто ня хоча, значыць, яны ў школе быць не павінны. Гэта трэба казаць адкрыта і сумленна», — заявіў Лукашэнка.

12:34 24.8.2020

Яшчэ аднаго сябра Каардынацыйнай рады выклікалі на допыт па справе аб «захопе ўлады»

Сябра прэзыдыюма Каардынацыйнай рады беларускай апазіцыі Лілія Ўласава выкліканая на допыт у Сьледчы камітэт.

«Ужо трэці сябра Прэзыдыюма Рады Лілія Ўласава выкліканая сёньня ў 15:00 у Сьледчы камітэт», — паведаміў «Інтэрфаксу» у панядзелак іншы прадстаўнік гэтага органа Павал Латушка.

Паводле «Інтэрфаксу», што Ўласава выкліканая ў якасьці сведкі па справе аб закліках да захопу ўлады, заведзенай Генэральнай пракуратурай.

12:34 24.8.2020

Калі Беларусь ня выйдзе з палітычнага крызісу, Фінляндыя гатовая замяніць менскую частку хакейнага чэмпіянату сьвету

Фінляндыя разглядае магчымасьць прыняць у сябе чэмпіянат сьвету 2021 году, спасылаецца «Прессболл» на прэзыдэнта Фінскай хакейнай асацыяцыі Хары Нумеля.

Акрамя таго, прэм’ер-міністар Латвіі Крыш’яніс Карыньш заявіў пра намер пачаць перамовы зь Міжнароднай фэдэрацыяй хакея аб правядзеньні першынства сумесна не зь Беларусьсю, а з «альтэрнатыўнай» краінай.

Паводле латыскага боку, калі палітычны крызіс у Беларусі захаваецца, будзе падтрымана ідэя пераносу спаборніцтваў у іншае месца. Чэмпіянат сьвету заплянаваны ў Рызе і Менску з 21 траўня па 6 чэрвеня 2021 году.

12:36 24.8.2020

Колькасьць удзельнікаў у мітынгу за Лукашэнку і «Маршы новай Беларусі» паводле МУС

Загрузіць яшчэ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

XS
SM
MD
LG